Est finidu pagora su progetu Amparu cun sa Festa natzionale de su Cantu a Tenore in su teatru Santu Zosepe de Nùgoro, un’eventu chi at trasformadu su cabu de logu barbaritzinu in su tzentru de s’identidade musicale sarda de traditzione orale. In prus de sa tzelebratzione formale de un’arte chi s’Unesco reconnoschet comente patrimòniu immateriale de s’umanidade, sa serada at ofertu una dimustratzione vibrante de comente una traditzione millenària si potzat annoare pro mèdiu de s’energia de sas generatziones noas.
Su datu prus significativu essidu dae su palcu nugoresu est difatis sa partetzipatzione de sos giòvanos talentos de ses grupos de càntigu: su Tenore Nulesu, su Cunsonu Andria Nìnniri de Tiesi, su Cuncordu Fonnesu, su Cuncordu Santu Bachis de Golòthene, su Tenore Santu Juvanne de Onieri, su Tenore de Orgòsolo. In custos grupos fiant totu pitzocos e calicunu at fatu laboratòrios de tenore in iscola sos annos colados.
Custa presèntzia massissa no est petzi unu datu numèricu, ma rapresentat sa mègius proa de unu passàgiu resèssidu de testimòngiu, garantende linfa vitale a un’eredade chi non si nche podet ispèrdere. Su progetu Amparu, finantziadu dae sa Regione Sardigna e atuadu dae s’ISRE in sinergia cun su coordinamentu Campos e cun sos assòtzios Boches a Tenore e Tenores de Sardigna, at postu paris 45 comunidades e prus de chentu grupos, giughende·nche su càntigu finas a intro de sas iscolas e in sos logos de sa cuotidianidade comente sos tzilleris.
Amparu at fatu de sas comunidades sas protagonistas mannas de sa tutela, impreende fintzas sas tecnologias noas e sos podcast pro torrare sa documentatzione prodùida a sa gente de custa terra e no a custa ebbia. Sa presidente Alessandra Todde, artziada a palcu, at garantidu s’impignu de sas istitutziones pro su chi pertocat su sustegnu de custu percursu, augurende una partetzipatzione galu prus manna, dae annoas, de sos giòvanos sardos. Su presentadore Bustianu Pilosu, coordinadore de sa rete de su cantu a tenore, at in fines naradu a sos giòvanos de no èssere petzi cantores, ma de si fàghere bardianos ativos e organizadores, pro chi su càntigu restet un’arte vìvida e non chistione de allega ebbia.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment