Su decretu pro mutzare sas tassas a subra de su carburante est intradu in vigèntzia su 19 de martzu, ma sos efetos, mescamente pro su disel sunt belle iscumpartos in pagas dies. Sa gherra de Israele e USA contra a s’Iran no est agatende fine e sa crisi est batende a subra su prètziu de sa benzina e de s’energia tantu chi su dinari postu boghende·lu a sa sanidade, a sas iscolas e àteros setores, sunt andados pèrdidos in pagu tempus. Sos arresonos intre USA e Iran non parent andare gasi bene comente est narende Trump e b’at semper s’upa de un’atacu de terra de sos istadunidensos. Est de pagas dies a oe sa noa chi su Qatar at ritiradu unu cuntratu de frunidura de gasu naturale cun s’Itàlia e àteros Paisos. Sa situatzione est peorende e in su mentres su 7 de abrile, sa die cando su decretu at a sessare, s’est acurtziende.
Pro custa resone sa Presidente Meloni est in chirca de agatare una manera pro nd’essire. Duas dies a como fiat in Algeria pro faeddare cun su guvernu de in ie pro ismanniare sa cantidade de metanu de comporare. Su problema est chi nemos de sos produtores cheret firmare acordos tropu longos, ca totu cantos ischint chi, si sa gherra at a sighire, sos prètzios ant a bolare fintzas de prus. Sa proposta de sos nord-africanos, tando, est cussa de negotziare onni pagu tempus prètziu e cantidade.
Sa mutzada de sas atzisas pro comente est, non podet sighire pro tempus meda: su gastu est tropu e sos chi bi balàngiant sunt chie de sa vetura non nd’at bisòngiu de a beru o chie est gasi ricu chi non sufrit sos prètzios artos. B’at unu bonus pro sos aziendas, ma tocat de agiudare a sos chi biàgiant pro traballu e non totu cantos. E forsis at a torrare su tempus de su traballu dae a tesu cara a s’elaboradore, ma nessi, custa borta, una passigiada l’amus a pòdere fàghere.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment