S’ierru torrat in beranu e batit astrau, fritu e bentu. Su tempus est peoradu in totu s’Italia cun s’intrada de su tziclone àrticu Deborah, chi at istraortu su cuadru meteo fintzas in Sardigna, batende traschia mala dae Nord a Sud. Eris, (26 de martzu), sas temperaduras sunt faladas maigantu, abba proana e nie sunt faladas puru in logos in ue sunt raras.
Sa Sardigna como s’agatat in su mesu de una temporada. S’ìsula est bisastrada dae currentes de maestrale nàschidas in sos setores setentrionales, chi si sunt isparghinende a lestru in totue. Sa Prutetzione Tzivile at sinnaladu bentos fortes, cun bentuladas chi tocant sos 90 chilòmetros a s’ora. Custa situatzione est boghende a campu maregiadas de importu mannu a cara a Nord-Ovest, pongende in perìgulu sa navigatzione e sa firmada a curtzu a sas costas.
Su tzentru de custa undada de traschia est unu turbione tziclònicu fungudu postu in s’Adriàticu de susu. Custu “ogru” de temporada nde batit ària frita dae sas latitùdines àrticas, causende nie chi in s’Appenninu tzentrale calat finas a sos 400-600 metros. Fenòmenos de fortza manna sunt interessende sas Marcas, s’Ùmbria e sas zonas internas de sa Toscana.
A su Nord, sa situatzione est matessi dificurtosa. In s’Artu Àdige su nie est torradu a rùere meda subra a sos 700 metros, batende a sa serrada de seguresa de sos passos Gardena e Sella pro su perìgulu artu de valangas. In Lombardia, imbetzes, s’allerta arantzu abarrat bia pro more de su bentu forte chi est impinnende sos socursos pro ramos truncados e coberturas de domo dagiadas.
Su cuadru meteorològicu at a abarrare crìticu fintzas oe (chenàura 27) de martzu. Mancari sas abbas proanas apant a minimare partende dae su Nord, su Tzentru-Sud e su costàgiu adriàticu ant a sighire a gherrare cun s’instabilidade. Su perìgulu at a èssere rapresentadu dae sas astradas a de note e a manzanu: cun su bentu prus mudu, sas temperaduras in sa Val Padana ant a falare suta de su zero, ponende in perìculu sas curtivatziones de istajone chi sunt giai in fiore.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment