Si in tempos colados s’anneu fiat su de su phishing, dae carchi annu una minetza semper prus aggressiva est s’intelligèntzia artifitziale generativa impreada non pro punnare a sa produtividade ma pro imbucare sa caminera de sos dannos informàticos.
Unu fenòmenu chi est dende de ite bìdere finamentas a sos prus ischidos est su Ai-Jacking: sos malintentzionados impreant modellos linguìsticos avantzados pro fraigare campagnas de ingegneria sotziale cosidas a manera chi pàrgiant nàschidas pro sas vìtimas. Analizende sos datos pùblicos in sas retes sotziales, un’aplicativu podet ingendrare una cramada cun sa boghe clonada de unu funtzionàriu chi autorizat, pro nàrrere, unu bonìficu, o unu vìdeu in tempus reale chi reproduit a manera perfeta unu collega.
Paris cun s’AI-Jacking podimus bìdere un’evolutzione de su Ransomware: si prima si pediat dinari comente riscatu pro decriptare sos documentos tzifrados, como b’at un’estorsione prus manna chi pertocat livellos meda; sos criminales furant datos sensìbiles e minetzant de los publicare e, si s’obietivu est un’azienda, cuntatant a sos clientes pro lis dare a ischire de sa violatzione. In cuntemporànea tirant atacos Ddos (Distributed Denial of Service) pro mantènnere firmos sos servìtzios fintzas a cando sa vìtima non pagat.
Sende chi sas tècnicas de difesa betzas non bastant, s’istrategia crae como est “zero trust”: iscumproare semper, a si fidare mai. Cada identidade, cada atzessu, cada dispositivu netzèssitant de èssere validados de continu; pagu importat si est in foras o in intro de sa rete aziendale. A sa sola, un’antivirus no est bastante, comente no est bastante sa difesa passiva. Sa seguresa non si podet comporare ebbia, ma tocat a la fraigare ativamente pro mèdiu de istùdiu, impignu, pro chi su fatore umanu (s’aneddu dèbile de sa cadena) si potzat difèndere dae sa vulnerabilidade: s’educatzione est una grandu arma de difesa.
Gianfranca Orunesu
(Foto de Matias Mango)
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22