Martis 24 de martzu in Danimarca ant fatu sas eletziones polìticas. Sos eletores si sunt espressados pro sa cumpositzione de su parlamentu, costituidu dae 179 sègios, partzidos intre sas tres natziones de su Regnu: 175 pro sa Danimarca, 2 pro sa Groenlàndia e 2 pro sas Far Øer.
Su partidu de majoria relativa, su Sotzialdemocràticu, s’est cunfirmadu su prus votadu, cun su 21,85%, ma at pèrdidu 12 sègios, passende dae 50 a 38. In segunda positzione ddo’est sa Manca Birde, cun 11,59% e 20 sègios. A coa sos liberales de Venstre, cun su 10,14% e 18 sègios.
De signalare su 9,10% de su Dansk Folkeparti, partidu de destra, in crèschida manna, chi dae 5 sègios creschet a 16.
Su primu ministru Mette Frederiksen, 48 annos, chi est a sa ghia de su Partidu Sotzialdemocràticu dae su 2015 e de su guvernu dae su 2019, at presentadu sas dimissiones a su re Federicu X e como est sa candidada printzipale pro tènnere s’incàrrigu de unu mandadu esplorativu pro formare un’esecutivu nou.
Sa coalitzione de guvernu in essida, chi a prus de Sotzialdemocràticos e Liberales fiat formada dae sos Moderados, issos puru in calu, dae 16 a 14 sègios, tenet como 70 de sos 90 sègios chi ddoe cheret pro guvernare e duncas s’alleàntzia de tzentrumanca diat chèrrere allargada.
Frederiksen aiat cunvocadu eletziones antitzipadas, pensende de regòllere unu mègius resurtadu. Sa crisi diplomàtica cun sos Istados Unidos pro sa Groenlàndia pariat chi aiat cumpatadu sos danesos a segus de sa lider issoro, ma carchi cosa no at funtzionadu.
A prus de s’integridade de su Regnu e de su ruolu a intro de sa NATO, custu puru acapiadu a sa chistione groenlandesa, aterunu tema chi est de atualidade in su dibàtidu polìticu de s’istadu iscandinavu est s’immigratzione, massimamente cudda islàmica. Giai su guvernu Frederiksen aiat leadu medidas prus restritivas pro su chi pertocat sas rechestas de asilu e sas riunificatziones familiares.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment