A pustis de unu viàgiu de tres meses peri pratzas, iscolas e tzilleris de Sardigna, su progetu Amparu ponet in calendàriu s’atu finale suo. Sàbadu su 28 de martzu, dae sas 6 de borta de die, su Teatru “San Giuseppe” de Nùgoro, in carrera de Trieste 48, at a ospitare sa Festa Natzionale de su Cantu a Tenore. S’eventu punnat a tzelebrare una traditzione reconnota dae s’Unesco comente patrimòniu culturale immateriale de s’umanidade, serrende in manera ufitziale su pianu de tutela atuadu in custos meses.
Sa serada, presentada dae Bustianu Pilosu de sa Rete de su Cantu a Tenore, oferit unu programma prus chi non ricu alternende momentos de aprofundimentu culturale e esibitziones musicales de bundu. Sa Festa l’ant a abèrrere sos saludos de sa Presidente de sa Regione autònoma de Sardigna Alessandra Todde. In fatu suo, su benebènnidu de sas rapresentàntzias de s’Isre e de su coordinamentu Campos.
Ant a sighire sas arresonadas, momentos de riflessione e dibata, curados dae espertos de su setore comente Ignazio Macchiarella, Diego Pani e su giai mentovadu Pilosu. Su pilastru de sa festa at a èssere però rapresentadu dae sas cantadas chi s’ant a presentare cun variedade manna de formatziones e de istiles. In su palcu ant a cantare su Tenore Nulesu, su Cunsonu Andria Nìnniri de Tiesi, su Cuncordu Fonnesu, sos Cantores de Irgoli, su Cuncordu Santu Bachis de Golòthene, su Tenore Santu Juvanne de Onieri, su Tenore de Orgòsolo.
In programma fintzas su grupu Launeddas a Cuncòrdia (cun Gianfranco Meloni, Ignazio Zucca e Fabrizio Rosas), sa Cantada campidanesa a bàsciu e contra (cun sos cantadoris Antonellu Orrù, Marcu Melis e Tanieli Filia e cun sa contra Pàulu Pilleri e Giusepi Tatti) e sa Gara de poesia a bolu logudoresa (cun Brunu Agus e Zosepe Porcu).
Pro garantire sa partetzipatzione màssima a s’eventu, sa manifestatzione l’ant a trasmìtere in direta in su canale YouTube @ProgettoModas e in su canale 79 de su digitale terrestre Rts. S’initziativa serrat unu percursu finantziadu dae sa Regione Sardigna tràmite sa lege regionale 12/2025 e atuadu dae s’Isre. Ànima de su progetu est sa sinergia intre su coordinamentu Campos e sos assòtzios Tenores Sardigna e Boches a Tenore.
Dae su mese de nadale a oe, Amparu at rugradu s’ìsula lompende a sos tzentros de Aidumajore, Alà, Benetuti, Bitzi, Golòthene, Bono, Bortigale, Urtei, Busache, Garteddi, Illorai, Irgoli, Lanusè, Lodè, Lùvula, Mamujada, Norghiddo, Nule, Nùgoro, Ulìana, Ollollai, Orane, Orgòsolo, Orosei, Oroteddi, Orune, Otzana, Ovodda, Sarule, Sèneghe, Silanos, Sìnnia, Tiesi, Torpè e Biddamanna Strisàili.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment