Dae sa sete de mangianu a sas ùndighi de note de oe, e dae sas sete de mangianu a sas tres de bortaedie de cras si votat pro su referendum costitutzionale a subra de sa Giustìtzia. B’at petzi un’ischeda cun una dimanda ebbia e cun una risposta de seberare: eja o nono. Sa chistione est cumplessa, ca pertocat argumentos tècnicos chi podent influentzare s’andanta e sos echilìbrios de unu setore chi s’acàpiat a sa polìtica, a s’economia e sas bidas de sas persones.
Sos càmbios sunt mescamente bator. Su de unu: partidura de sas carrieras intre Pùblicu Ministèriu, chi est su chi depet iscumbatare sas acontèssidas e fraigare s’acusa, e giùighe, su chi sèbera si assòrvere o cundennare e de cantu est su castigu, como si podet colare dae una a s’àteru rolu una borta ebbia in sa bida, mudàntzia chi càpitat a raru. Su de duos est chi sas duas figuras ant a èssere giudicadas dae duos òrganos de bàrdia autònomos, como bi nd’at unu pro ambas duas. Su de tres est chi at a nàschere una Corte Disciplinare pro sos magistrados. Su de bator est chi sas persones chi ant a intrare in custos òrganos ant a èssere sortegiados.
Chie est pro sa riforma narat chi diat pòdere dare una manera pro regulare su poderiu giuditziàriu tropu lìberu e capatze de isciusciare una bida sena pagare faddina peruna. Su problema est chi meda de sos piessignos a subra de comente at a èssere de a beru sa giustìtzia a pustis non si podent galu ischire, ca mancant unas cantas leges atuativas e chi ant a sinnare sa lìnea benidora bera. Tando bisòngiat de tènnere fide a subra de su guvernu e de sas punnas suas.
Dae s’àtera ala, chie est contra a sa riforma, narat chi sa punna cuada de Meloni est de pònnere sa magistradura a suta de su controllu de su guvernu. Difatis, si est beru chi su sortègiu balet siat pro sa parte tècnica siat pro cussa polìtica, sa prima ponet in s’urna totu cantos sos magistrados e sos giùighes; sa segunda petzi cussos seberados dae sa polìtica. Una minoria organizada contra a una majoria de gente chi nemmancu si connoschet.
Est craru chi no at a èssere un’eletzione sena cunseguèntzias pro su guvernu, chi at fatu propaganda a sighidura in custas chidas. Sos ùrtimos sondàgios contaiant de una batalla de giogare e cun eletores maicantos chi no ischiant galu si votare e ite.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment