Diplomatzia e garbu. Bi semus torra. Su tycoon at istèrridu una sentèntzia noa dae su social suo Truth. Su chiu? S’Europa est unu tàgiu de nasimoddes chi preferint a si nche cuare a palas de su tziu Sam imbetzes de s’imbrutare sas manos. Su minisprètziu suo l’at bòmbidu impreende carchi paràula chi unu tempus la naraiat Mao Zedong pròpiu contra a s’imperialismu amerikanu: Sa Nato «est una tigre de pabiru!». Custu su post suo: «Sena sos istados unidos sa Nato est una tigre de pabiru. Non s’est chèrfida unire a sa gherra pro firmare un’Iran nucleare. Como chi cussa gherra est bìnchida a livellu militare, cun pagu perìgulu a beru pro issos, si lamentant de sos prejos artos de su petròliu chi sunt custrintos a pagare, ma non nos cherent agiudare a abèrrere s’Istrintòrgiu de Hormuz […]. Covardos, non nos l’amus a ismentigare!». Ma sa diplomatzia de su “bulldozer” non s’est firmada a sas costeras de s’Atlànticu. Si s’Europa est una tigre de pabiru, fintzas sos raportos istòricos cun s’Àsia podent èssere reduidos a tzarrada de tzilleri. In un’addòbiu in s’istùdiu ovale cun sa prima ministra de su Giapone, Sanae Takaichi, Trump at rispostu a una pregonta de unu giornalista giaponesu bastante crara: «Pro ite no ais avisadu a sos alleados de s’atacu a s’Iran?». Issu, a contu suo brullende, at ammentadu s’atacu de s’esèrtzitu giaponesu de su 1941 a sa base americana de Pearl Harbor, in sas ìsulas Hawaii, chi aiat provocadu s’intrada de sos Istados Unidos in sa segunda gherra mundiale contra a sa Germània nazista, a s’Itàlia fascista e a su Giapone imperiale. Gherra chi est concruida bator annos a pustis cun sas bombas nucleares istadunidensas in Hiroshima e Nagasaki, chi aiant mortu prus de 200mìgia tziviles. Custu est su chi at naradu Trump a su giornalista: «No l’amus naradu a nemos ca cherìamus s’efetu sorpresa. Bois non seis espertos? Pro ite no ais avisadu de s’atacu a Pearl Harbor, eh?». Sa cara de sa premier giaponesa naraiat totu.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment