Su tempus coladu fiat su de sas app. Su tempus presente est su de sas app fatas cun sos chatbot. Su tempus benidore at a èssere su de sos chatbot in càmbiu de sas app. Custa chi deretu nos diat pàrrere una previsione tecnològica ebbia est imbetzes su manifestu de una rivolutzione chi movet dae una veridade iscumproada: a livellu de interfache impreamus sos telefoneddos pagu prus o mancu che a binti annos a como.
Su mundu in ue sas iconas no ant a populare prus sos ischermos tàtiles de sos dispositivos nostros l’at contadu Carl Pei, ceo de s’azienda Nothing, in su palcu de su fèstival SXSW 2026 (nàschidu su 1987 comente apuntamentu musicale ebbia e chi oe pertocat fintzas su tzìnema e sa tecnologia), in Austin, Texas. Nothing, azienda londinesa ispetzializada in telefoneddos cun design trasparente e estètica glitch, at dae pagu regortu 200 milliones de dòllaros pròpiu conca a custu imbeniente “AI first”.
Custu, in pagas paràulas, su paradossu contadu dae Pei: impreamus s’intelligèntzia artifitziale pro generare còdighes e àere aplicatziones noas in pagos minutos, ma sa punna est pròpiu sa de eliminare sa netzessidade de custas aplicatziones. De su restu, si sos chatbot resessent a fàghere un’app, diant dèvere resèssere a fàghere su chi faghent sas app. Su smartphone, duncas, no at a èssere prus unu cuntenidore de software ma un’agente ativu.
Su sistema operativo at a connòschere prus chi non bene sas intentziones nostras a su puntu de traballare deretu in forma proativa, furriende in repertos archeològicos sos menu e sos butones fatos pro sos pòddighes nostros. Non b’at a èssere duncas s’intermediatzione de sas app; petzi pro s’arresonada direta cun sos chatbot e s’integratzione de sas solutziones. Pro cantu tempus amus a intèndere sos concruos de cada casta de publitzidade chi oe finint totu cantas belle che pare narende·nos “Scarica l’app”?
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment