Dae sa rivolutzione vitoriosa de su 1959, Cuba mai at sessadu de rapresentare unu sìmbulu de disafiu a sas lògicas de domìniu coloniale in tretos caraìbicos. Su chi nascheit comente un’atu de soberania natzionale s’est mudadu, in su tempus, in una gherra de resistèntzia fitiana contra a un’assèdiu econòmicu chi oe connoschet sa peus cara. Su blackout totale de sas dies coladas, chi ay lassadu s’ìsula in s’oscuridade, est petzi s’ùrtimu sìntomu de un’istrategia de asfissia deliberada. Custa crisi energètica est ligada a dinàmicas regionales, mescamente a pustis de sas manovras americanas in Venetzuela. Corfende a Caracas (Maduro est galu impresonadu in Usa), Trump at chertu truncare cordone de s’imbìligu de sos rifornimentos petrolìferos diretos a s’Avana. Sa punna est de cajonare su collassu sotziale pro mèdiu de sa privatzione, isperende chi su disisperu de sa gente abèrgiat sas ghennas a su controllu yankee de s’ìsula, a sas cunditziones de corte de domo pèrdida 67 annos a como. E puru, in custu iscenàriu de isulamentu fortzadu, sa risposta internatzionale no at tardadu a si presentare. In totue b’at initziativas de solidariedade, fintzas alimentadas dae s’ammentu de sa dadivosidade cubana chi, pro mèdiu de sas brigatas mèigas suas, at giutu sucursos peri su mundu in sas fases prus graes de sa pandemia. Dae sas campagnas de regorta de fundos pro s’imbiu de fàrmacos essentziales a sa mobilitatzione polìtica contra a s’embargu, b’at una rete globale che non cheret bìdere Cuba in ghenugros rendende·si a sa prepotèntzia de s’imperu. Sa batalla de custu tempus no est petzi cussa pro torrare a inchèndere sas lughes in sas domos, ma pro difèndere su diritu de unu pòpulu a disinnare su benidore suo sena chi su fàmene e s’iscurigore siant armas de ricatu geopolìticu in un’iscenàriu de potèntzias cada una papende·si su chi tenet a costàgiu suo.
mauro piredda (foto matthias-oben)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment