Alì Ardashir Larijani, Segretaràriu de su Cussìgiu Supremu pro sa Seguresa Natzionale, est mortu. Sa die ufitziale de sa morte est su 17 de martzu. Giai eris sos israelianos aiant annuntziadu chi dd’aiant mortu, ma sas autoridades iranianas a printzìpiu aiant negadu. Como però finas Teheran at ammìtidu ca sa nova est bera.
Larijani, chi teniat 67 annos, fiat in càrriga dae ocannu passadu. Teniat una làurea triennale in informàtica e matemàtica e in prus aiat fatu unu master e unu dotoradu in filosofia otzidentale. Su filòsofu tzentru de sos istùdios suos fiat Kant, tantu chi aiat publicadu unos cantos libros dedicados a s’òpera de su pensadore tedescu, che a Su mètodu matemàticu in sa filosofia de Kant, Metafìsica e sas sièntzias esatas in sa Filofofia de Kant, Intuitzione e sos giudìtzios sintèticos a priori in sa filosofia de Kant.
Sa morte de Larijani, a pustis de sa de Khamenei senior e de su ferimentu de Khamenei junior, sunt lassende s’Iran sena de una cadena de cumandu tzentralizada. Sa cosa non diat dèpere firmare sa gherra de difesa de s’istadu persianu, chi sighit a rispòndere a sos atacos israeloamericanos.
S’eliminatzione fìsica de sos òmines de cumandu paret èssere est una prioridade pro s’Iran puru.
Difatis dae parte issoro sos iranianos ant decraradu de àere mortu in sos bombardamentos a Benjamin Netanyahu, Primu Ministru de Israele, a David Barnea, diretore de su Mossad, s’agentzia de sos servìtzios segretos pro sas operatziones èsteras, e a Yoav Gallant, generale e ex ministru de sa difesa de s’istadu ebràicu.
Custas mortes però non sunt cunfirmadas e, neghe finas de s’usu de filmados fatos cun s’inteligèntzia artifitziale in favore de una tesi o de s’àtera, est malu a cumprèndere, finas pro sos analistas, in ue finit sa propaganda e in ue cumintzat sa realidade.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment