Su Dolby Theatre at faeddadu craru: sa de Norantoto editziones de sos Academy Awards sinnat sa cunsacratzione pretzisa de Paul Thomas Anderson cun “One Battle After Another” (Una batàlla a pustis de s’àtera), chi at triunfadu batende a domo ses istatueddas. Intra de custas b’est su Mègius film e sa Mègius Regia. Pro su cineasta de Magnòlia est su primu Oscar a pustis de ùndighi “nominations”, unu reconnoschimentu chi prèmiat unu caminu de traballu longu chi, in finitia, lu bidet pigare a sos chelos prur artos de su tzinema mundiale.
Sa tzirimònia est istada unu “cara a cara” cun “Sinners” (Sos pecadores) de Ryan Coogler. Mancari sas sèighi candidaduras in partèntzia, sa saga subra a sos vampiros in su Sud segregatzionista si nch’est firmada a prèmios prus pagu de importu, mancari de balore, che a sa Mègius iscenegiadura originale e su Mègius atore protagonista. Difatis, Michael Jordan at bintu subra de su favoridu Timothée Chalamet, in unu de sos ispantos mannos de su note.
Dae s’ala de sas fèminas non s’idet peruna meravìgia: s’irlandesa Jessie Buckley at bintu su prèmiu de Mègius atora pro Hamnet. Intre a sos “Non protagonistas” ispicat Sean Penn (chi però non s’est presentadu ca fiat impignadu in Ucraina) e Amy Madigan pro s’horror Warriors. S’editzione 2026 at a passare a s’istòria pro sa nàschida de su prèmiu a su Mègius Casting (chi est andadu a Cassandra Kulukundis) e pro su record de Autumn Durald Arkapaw, prima fèmina (fintzas de colore) a bìnchere pro sa Mègius Fotografia (Sinners).
Mancari Conan O’Brien apat afatu una presentada acuta, brullende subra a s’intellighèntzia artifitziale e subra a sos iscàndalos britànnicos, sa polìtica nd’est restada pro maigantu tempus in foras, ma nd’est brincada a tzocu cun sa essida de boghe “Free Palestine” de Javier Bardem e sas paràulas tostas de sos documentaristas de Mr. Nobody Against Putin, chi dae su backstage at lampadu unu amonimentu pro su benidore de sa democratzia americana.
Si est a beru chi su norvegesu “Sentimental Value” s’est dèpidu acuntentare de su prèmiu pro su Mègius Film internatzionale, s’Itàlia regollit una resessida minore ma sentida: Valentina Merli est intre a sos premiados che a co-produtora de su curtzu live action “Two People Exchanging Saliva”, ùnica soddisfatzione pro unu tzìnema italianu restadu a foras dae sas categorias printzipales a pustis de sa resessida mancada de Famìlia.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment