Sa manipolatzione digitale est lòmpida oramai a unu livellu crìticu: s’intelligèntzia artifitziale generativa est oe a tretu de clonare caras e boghes cun realismu mannu. Nche l’amus brincada dae meda sa fase de sa curiosidade tecnològica, ca custos istrumentos sunt capatzes de arruinare vidas cun pagos clic e luare s’ispàtziu pùblicu de s’informatzione. Est in custu iscenàriu de vulnerabilidade estrema chi s’ordinamentu italianu at detzisu de atzellerare, punnende a un’amparu orgànicu de s’identidade digitale de sos tzitadinos.
Finas a oe b’aìamus una lege, sa 132 de su 2025, chi at introduidu in su còdighe penale su casu particulare de su reatu de difusione illètzita de contenutos manigiados tràmite IA. Como b’amus unu disegnu de lege nou, su 644, pensadu pro frunire istrumentos prus cumpletos e sistèmicos capatzes de guvernare sa cumplessidade de unu disafiu chi no est prus petzi tecnològicu.
Custu ddl – nde sunt faeddende in su Senadu – atribuit a cada persone su diritu esclusivu suo de s’identidade personale, finas cando est ricreada dae s’IA, impedende cale si siat riprodutzione, imitatzione o difusione sena su cunsensu esplìtzitu (informadu e documentadu) de s’interessadu. Duncas su nùmene, s’immàgine, sa boghe, sa chìgia non podent èssere riproduidos, simulados o mudados.
Custa norma diat pàrrere de aplicare finas in sos campos de s’arte e de sa sàtira, si andant contra a sa dignidade personale. Mancari s’inasprimentu normativu de sas dispositziones de sa 132, s’architetura giurìdica atuale non tenet unu baritzentru unitàriu, e chie nche finit in intro de sas manipolatziones deepfake si devet afidare a normas diferentes de su Còdighe tzivile, de su Còdighe penale, de su diritu de autore, de sa privacy. Est pro custu chi, si narat, cun su ddl diant chèrrere rispondere a custa urgèntzia pro mèdiu de un’interventu orgànicu.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment