Foto leada dae ffr.fr
Sa Frantza s’est cunfirmada campione de su Ses Natziones de rugby. S’ùrtimu turnu, giogadu sàbadu 14, at bidu s’Irlanda, in Dublinu, vitoriosa in sa prima partida contra a s’Iscòtzia. Sa prima meta birde arribat a su 3’ cun s’estremu Osborne, ma a su 7’, a pustis de 19 fases, Graham marcat pro su 15 de su Cardu. Ambas duas metas sunt trasformadas. A su 10’ torrat in bantàgiu s’Irlanda, dae maul, cun su tallonadore Sheean e a su 19’ tocat a s’ala Baloucoune, cun Crowley chi faddit sa segunda trasformatzione.
In sa ripresa metas de Russell a su 52’, de su capitanu irlandesu Doris a su 61’ e torra de s’Iscòtzia a su 61’, totus trasformadas.
Sos meres de domo però si nch’istèsiant cun meta de s’ala O’Brien a su 68’, punitzione de Crowley a su 73’ e torra O’Brien a su 80’ pro more de una faddina de Tuipulotu chi non controllat sa botza. Sas trasformatziones de Crowley fissant su resurtadu a 43-21 dende a s’Irlanda Trìplitze Corona, pro àere bintu a sas àteras tres Home Unions, e prima positzione temporànea.
In Cardiff su Galles at torradu a bìnchere in su Torneu a pustis de 15 derrotas a fila a pare. Tres metas trasformadas, duas de su nùmeru 8 Wainwright e una de su tallonadore Lake dae maul, serrant su primu tempus contra a s’Itàlia 21-0.
In sa ripresa sos dragones faghent àteros 10 puntos, totus cun s’abertura Edwards, chi andat in meta a su 44’, trasformat e a su 48’ intzertat unu drop dae a tesu. Sos italianos marcant tres metas, sa prima ebbia trasformada, cun grogu a Griffith pro atzione fallosa, a su 52’ cun Di Bartolomeo, a su 69’ cun Allan e a tempus iscadidu cun Garbisi. Finale 31-17.
In Parigi est istada gherra puntu a puntu. Detzisivu s’estremu Ramos, chi non faddit mancu una trasformatzione. Cumintzat s’ala manca Bielle-Biarrey a su 7’ (in sa foto). A su 10’ rispondet s’ala Roebuck. Torra Bielle-Biarrey a su 13’. A coa sos inglesos marcant tres metas, duas trasformadas dae F. Smith, cun s’ala Murley a su 19’, cun sa tertza lìnia Chessum a su 26’, a pustis de una punitzione realizada dae Ramos, e cun sa segunda lìnia Coles a su 34’. Una punitzione de F. Smith dat 10 puntos de bantàgiu a s’Inghilterra, ma a tempus iscadidu una meta tècnica, cun grogu a Genge, dat àteros 7 puntos a sa Frantza.
In sa ripresa su copione est uguale. Galu Bielle-Barrey su primu a marcare a su 42’, a coa Attissogbé a su 48’. Sos inglesos rispondent cun Chessum, chi a su 51’ intertzetat una botza de Jalibert, e a su 57’ cun Marcus Smith, cun trasformatzione de F. Smith. A su 66’ Bielle-Barrey marcat sa de bator sua. S’ammonitzione a Bamba lassat sos meres de domo in 14 e su bìndighi de sa Rosa nd’aprofitat e andat in meta cun su tzentru Freeman a su 77’. Sa trasformatzione de M. Smith ddos mandat unu puntu a subra ma a tempus iscadidu una punitzione de Ramos dat partida, 48-46, e torneu a sos bleus. Classìfica: Frantza 21, Irlanda 19, Iscòtzia 16, Itàlia 9, Inghilterra 8, Galles 6.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment