Est una Frantza polarizada a fundu sa chi nd’est essende dae su primu turnu de sas votatziones munitzipales. Cun s’afluèntzia chi est torrada a crèschere cunforma a su 2020 (intre su 55 e 60% in medas tzitades mannas), sa cramada de eris s’est trasformada, comente fiat fàtzile a lu prevìdere, in sa “proa generale” pro sas presidentziales de annoas. Sos atores printzipales sunt su Rassemblement National (RN) e La France Insoumise (LFI). Su partidu de Marine Le Pen at cunfirmadu sa fortza sua fintzas in sos tzentros mannos, e no in sa zonas rurales ebbia. In Marsìglia, su candidadu RN Franck Allisio at otènnidu unu parègiu tècnicu ispantosu (belle su 35%) cun su sìndigu uscente de manca Benoît Payan. In Nitza, Éric Ciotti, alleadu de sa dereta estrema, est in pole position pro nche li tòddere sas craes a Christian Estrosi. A s’àtera ala, sa manca radicale de Mélenchon at mobilitadu sos giòvanos, otenende resurtados istòricos in Roubaix e bardiende bene sas periferias de sas metròpolis. In Parigi, su sotzialista Emmanuel Grégoire est sa “tête de la course” cun su 36,5%. Sos chi nde essint a manos iscutas sunt sos de su blocu tzentrista ligadu a sa majoria presidentziale chi non resesset a pònnere raighinas a livellu locale. Fintzas sos cunservadores traditzionales (LR) parent oramai ischitzados intre su blocu soberanista e sas coalitziones de manca. Francu chi in Le Havre, in ue s’ex prèmier Édouard Philippe est a dae in antis, cunfirmende·si comente un’erede possìbile pro s’Eliseu. «S’assemblea natzionale de RN – at naradu Jordan Bardella, delfinu de Le Pen – isterret sa manu a sas listas de dereta e a sas listas indipendentes, a totu sos chi refudant su disòrdine de sa manca estrema e sa confluèntzia in su macronismu». «Un’istrategia e unu progetu craros – at naradu Jean-Luc Mélenchon -ant permìtidu a La France Insoumise de avantzare de meda. Podimus bìnchere in Lilla, Roubaix, Limoges, Saint-Denis, Tolosa e de sas listas nostras non nde podent fàghere a mancu in Parigi, Lione e Marsìglia». Como tocat de bìdere su segundu turnu de su 22 de martzu.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment