Sunt tempos, custos, de cambiamentos de sustàntzia in su panorama de sa messagìstica digitale. Un’annùntziu in custa diretzione est lòmpidu dae Meta pro s’8 de maju de ocannu. Dae custa data, Instagram non bi l’at a sighire cun sa critografia end-to-end, cussa tecnologia ue petzi sas persones comunichende intre issos podent bìdere o ascurtare su chi est imbiadu. Est una novidade chi non garantit prus sa seguresa màssima chi amus connotu cun custu protocollu. Ma Meta non est petzi Instagram. E pro custu dae su giru de Mark Zuckerberg sunt narende de colare a sa messagìstica de WhatsApp, ue sa protetzione est ativa “de default”, predefinida.
In su mentres sos utentes de Instagram ant a retzire inditos prus a minudu in contu de messàgios e de documentos multimediales imbiados pro los pòdere iscarrigare dae sas conversatziones interessadas in antis chi sa funtzione isparessat de su totu. Ma no est una nova noa, custa. In antis de la lèghere pro Instagram nd’aìamus lèghidu pro su chi pertocat TikTok. Su motivu? Sa netzessidade de tutelare sos minores e agiudare su cuntrastu a sos contenutos illegales.
Est gasi chi torrat in agenda s’allega in riferimentu a sos diritos de riservadesa e a sas esigèntzias investigativas. Si a un’ala sos sustenidores de sa privacy bident in sa critografia su mègius iscudu contra a sa sorvelliàntzia, a s’àtera b’at chie timet su fenòmenu de su “Going Dark”, est a nàrrere s’impossibilidade de atzèdere a proas detzisivas finas in presèntzia de unu mandadu. De cada manera, su 2026 at a èssere un’annu partziabbas: si Meta est torrende a sestare sas làcanas de sos servìtzios suos, tocat a bìdere cale at a èssere s’istrategia de sa Cummissione europea. S’obietivu est ambitziosu: agatare s’echilìbriu intre sa seguresa informàtica, sos diritos fundamentales e sa netzessidade de lassare zonas umbrinas cun libertades mannas pro sos malintragnados.
Gianfranca Orunesu
(Foto de Omkar Patyane)
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment