Su cungressu de s’Alighera de sa Fasi chi serbiat pro votare s’istatutu nou est istadu su momentu in ue sos echilìbrios si sunt segados. Dae tempus maicantu b’aiant tensiones pro ideas e interessos diferentes, ma sa riunione at àpidu carchi istorbu in prus, chi at fatu tzocare totu. Difatis, pròpiu s’argumentu e sa manera de custas eletziones ant fatu arrennegare unu cantu de sos assòtzios de sos emigrados sardos chi ant seberadu de presentare unu ricursu a su tribunale de Piacèntzia e de si nch’andare dae sa Federatzione de sos Assòtzios Sardos in Itàlia.
Dae custa essida de 24 assòtzios, de 70 totales, est nàschidu SEU (Sardos Emigrados Unidos) ghiadu dae Sara Nicole Cancedda. Su primu passu — decraradu in sa presentada — est unu camminu pro ascurtare sos bisòngios de sos sardos emigrados in fora de s’ìsula a subra de fainas importantes: sa mobilidade de sos giòvanos, su traballu, sa manera de annoare e dare bàlia a sas cumpetèntzias chi bi sunt intro e àteras puru. Totu cun s’idea de iscrìere su manifestu de s’assòtziu, sas lìneas pro s’ite fàghere in su benidore e sa carta de sos balores. Sa punna est cussa de divènnere un’àteru òrganu chi potzat faeddare cun sa Regione pro «promuovere temi e proposte concrete».
Sa FASI gasi truncada, però no est unu sinnale bonu, mescamente pro sos sardos chi abarrant in Sardigna. Tènnere un’òrganu ebbia de sos sardos ligados a s’ìsula, pònnere totu in unu logu sas intellighèntzias e sas ideas, daiat prus fortza a sos progetos e una boghe polìtica prus crara. Cun custa partzimenta b’at a èssere una gara a sos fundos regionales e duncas una dipendèntzia polìtica prus manna, premiende chie est prus fidele a sa lìnea de sa Giunta. S’ispera est chi custa cuntierra potzat torrare borta e sanare.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment