B’at unu momentu chi s’innovatzione tzelat de èssere una proa de ingèniu pro si fàghere sèberu craru. Pro Caitlin Kalinowski, cussu momentu est cumbinadu cun sa firma chi at presu OpenAI a su Pentàgonu. Sa nova no est petzi sa crònaca de una dimissione ma su marcu de una fratura funduda in su coro de sa Silicon Valley, e la contamus a pustis de àere faeddadu de sa chistione Anthropic.
Kalinowski, cabu de su dipartimentu de robòtica e giai òmine de Meta, non s’est limitadu a lassare s’ufìtziu suo, ma at ghetadu un’ammonestu: sa tecnologia non podet èssere neutrale si l’impreamus pro sa gherra. «S’IA – at naradu – tenet una funtzione de importu mannu in sa seguresa natzionale. Ma sa sorvelliàntzia de sos americanos sena una supervisione giuditziària e s’autonomia sua sena autorizatzione umana sunt chistiones chi cheriant meledu».
Sa chistione, duncas, no est tècnica ebbia, ma filosòfica. A podet un’intelligèntzia, nàschida pro chi s’umanidade si nde goset, èssere s’istrumentu de pretzisione de un’aparadu militare? Si pro Sam Altman, su Ceo de OpenAI, totu torrat, che chi s’acordu esseret a beru pro sa seguresa natzionale, intre sos dipendentes b’at prus de una duda. A su puntu chi, via social, b’at chie est pedende de publicare, a minudu, sos detàllios de s’acòrdiu.
In intro de s’azienda su clima no est de sos mègius: treghentos e prus traballadores de su setore ant firmadu lìteras de solidariedade. S’acontèssida est duncas ammustrende chi in su mundu de s’AI non b’at petzi silìtziu o algoritmos. Sas persones bi sunt. E cando custas bident chi sa làcana intre progressu e controllu est isvanessende, sa fua no est un’atu de protesta ebbia, ma carchi cosa de prus. In su mentres Anthropic, cuncurrèntzia a OpenAi chi nd’amus giai faeddadu martis in custas pàginas, est creschende semper de prus.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment