A pustis de sas bruturas internatzionales de custos ùrtimos tempos, peoradas dae sa gherra in Iran, in sa dibata econòmica est torrende a preocupare su costu de sos mùtuos. Mancari crescant sas timòrias pro sos mercados energèticos, su setore de su crèditu immobiliàre non est istadu corfidu dae iscossas de importu: sas ofertas de sas bancas abarrant cumpetitivas e a filu cun sas ùrtimas chidas.Est unu momentu in ue su mercadu oferit possibilidades pagu firmas. Sos mùtuos a tassu fissu prus cumbenientes sunt pagu a suta de su 3 pro chentu, mentras su tassu variàbile movet dae su 2,3 pro chentu, prus o mancu. Custu ùrtimu non resurtat meda econòmicu in su tempus curtzu, ma batit prus paga seguresa in su tempus longu.
Sa pregunta est: proite sa gherra non est resurtende galu grave pro sos mùtuos? Su ligàmene non est mecànicu. Sos tassos immobiliàres dipendent dae s’Euribor e dae sos isetos pro su tempus benidore, indicadores chi finas a como non ant mustradu variatziones de importu.
Su perìgulu beru abarrat in s’inflatzione. Sos datos Istat de freàrgiu sinnalant una pigada de sos prètzios: su “carrellu de s’ispesa” est passadu dae s’1,9 pro chentu a su 2,2 pro chentu, mentras s’inflatzione generale est artziada a s’1,6 pro chentu. Mancari custu aumentu pro como non apat cunditzionadu sos mutuos, diat pòdere ispinghere sa Banca Tzentrale Europea a torrare a bìdere sos pranos de reduitzione de sos tassos, iscostiende a innantis sos incùrtzios prevìdidos pro ocannu.
E tando, cales cunsìgios si podent dare a chie tenet (o chircat) unu mùtuu? Chie at seberadu su fissu podet dormire sonnos tranchillos cun ratas chi non càmbiant. Chie tenet su variàbile, imbetzes, depet abbaidare cun atentzione sos ìnditzes de riferimentu, ca cada artziada de sos tassos si traduit in unu acreschimentu de sa rata. Pro chie cheret comporare domo, in custu passu de intzertesa, sa paràula d’òrdine est cumparàntzia. Est pretzisu de fàghere simulatiziones de pranos diferentes, valutende non su tassu ebbia, ma fintzas sas ispesas in prus (perìtzia, istrutòria, asseguratziones) e sa capatzidade pròpia de rèzere brincos de su mercadu in su tempus benidore. Pro nche la truncare in curtzu: mancari su cuadru geopolìticu pedat prudèntzia, sas cunditziones de oe abarrant bonas pro chie tenet una pianificatzione finantziària firma.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment