Foto leada dae snb.ch
Domìniga 8 de martzu sos tzitadinos isvìtzeros ant votadu in sas federales, pro s’espressare subra 5 cuesitos de diferente natura.
Su chi at registradu sa detzisione prus importante est cuddu pro s’introdutzione de s’usu de su dinari contante in costitutzione.
Sos cuesitos chi pertocaiant custu tema fiant duos. Su primu no est passadu, ca dd’ant cunsideradu pagu craru e malu a aplicare. Sa pregonta in s’ischeda fiat: Ei a una valuta isvìtzera indipendente e lìbera cun monedas o billetes (su dinari contante est libertade)?
S’àteru imbetzes, chi poniat in s’ischeda Cherides atzetare su decretu federale de su 17 de cabudanni de su 2025 chi pertocat s’unidade monetària isvìtzera e su rifornimentu in numerariu?, at otènnidu una renèssida bona cun su 73,4% de su votu populare e su pàrrere favorèvole de totu sos 23 Cantones.
Pro more de sa vitòria de sos ei como su francu isvìtzeru e sa possibilidade de pòdere usare semper su contante ant a finire finas in sa costitutzione federale.
Non sunt passados àteros duos cuesitos: unu pro abbacare su cànone de sa radiotelevisione pùblica dae 335 a 200 francos isvìtzeros. S’initziativa fiat de s’UDC (Unione Democratica di Centro), USAM (Unione Svizzera delle Arti e Mestieri) e Giovani liberali radicali e sa majoria, de su 61,9%, dd’at interpretada comente un’atacu a s’informatzione pùblica.
S’ùrtimu cuesitu chi sos isvìtzeros si sunt espressados fiat cuddu pro passare a una tassatzione individuale, chi at bintu de pagu, cun su 54,3%. Sos favorèvoles, pro su prus de manca, ddu cunsìderant unu passu a in antis ca como totu sas còpias, cojuadas o nono, ant a tènnere su matessi tratamentu fiscale; sos contràrios, in majoria de destra, ddu bident comente una penalizatzione pro sas famìllias monorèdditu.
In custu ùrtimu, chi fiat unu referendum, non ddo’aiat bisòngiu, a prus de su votu populare, de sa majoria de sos Cantones; in sos àteros bator imbetzes, chi fiant initziativas populares, ei.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment