No at a èssere ocannu chi aberimus ventanas noas. Mancari sas boghes curre-curre, dae Redmond sunt narende chi sunt totu fàulas sas chi nd’ant bogadu faeddende de sa de 12 versiones de Windows. S’istrategia de Microsoft no est cussa, ma sa de pensare a potentziare Windows 11. E custa istrategia lompet a pustis de annos de crìticas in contu de istabilidade e de recuisitos hardware.
Sa de risòlvere sos problemas istòricos est duncas sa punna, mirende a otimizare a fundu su còdighe pro chi si potzant garantire prestatziones prus performantes. Ma àteru b’at. Ponende mente a sos inditos e a sos disìgios de sos utentes prus nostàlgicos, paret chi torrent unas cantas funtziones icònicas comente sa barra mòbile de sas aplicatziones (chi si podet positzionare in sos oros laterales o in artu), una de sas mancàntzias prus cuntestadas dae sa versione de su 2021.
Su potentziamentu prus de importu at a pertocare, macu a lu nàrrere, s’intelligèntzia artifitziale pro mèdiu de Copilot. Ma pro isfrutare sas esperièntzias noas pro su chi pertocat s’AI in locale, s’hardware devet àere unos cantos recuisitos mìnimos: una NPU (Unidade de elaboratzione neurale) a tretu de garantire nessi 40 Tops (40 tera operations per second, 40 billiones de operatziones a su segundu). Custa potèntzia de càrculu at a permìtere de gestire protzessos cumplessos sena apesantire su cloud, garantende privadesa e lestresa.
Unu àteru pilastru de custu agiornamentu pertocat s’architetura Arm (Advancer risc marchine, ue su risc no est s’arriscu ma unu sistema cun set de cumandos minimizados): Microsoft cheret reduire su gap cun Apple Silicon megiorende s’emulazione de sas app x86 e perfetzionende sos consumos energèticos. In sìntesi, Microsoft est preferende a nche lassare a banda unu sistema nou pro chi Windows 11 siat una prataforma a tretu de integrare software traditzionale e intelligèntzia artifitziale generativa.
Gianfranca Orunesu
(Foto de Phil Desforges)
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment