Sende chi sa de su Kurdistan est una natzione de baranta milliones de persones partzidas in chimbe istados (Turchia, Sìria, Iraq, Armènia e Iran), est fàtzile a faeddare de issos cada borta chi b’at crisi in cussa àrea. Cun sas atziones bèllicas de Israele e Istados unidos contra a sa Repùblica islàmica de sos Ayatollah, sos curdos sunt invitados a si pesare pro dare su contributu issoro dae terra. Petza de masellu, in pagas paràulas, cando chi sos chi sunt invitende bombardant seguros dae mare e dae sas àeras. Armemus·nos e movide, si naraiat unu tempus. Non nch’at coladu tempus meda cando sos americanos, fatu su giogu contra a s’Isis carchi annu a como, ant traitu sos curdos de du Rojava ca nât chi (Trump dixit) «non nos ant agiudadu in sa segunda gherra mundiale». E como etotu sos curdos de Sìria sunt timende de fàghere fine fea pro more de sos guvernantes atuales ghiados dae su “ex” terrorista Al-Jolani. Su de sos curdos no est un’universu cumpatu. Si sos de Ocalan bisant unu cunfederalismu democràticu de sa natzione curda sena nche ghetare a terra sas làcanas de sos istados atuale, sos de Barzani in Iraq non sunt de sa matessi idea e, de facto, sunt pensende a s’amministrare su tretu issoro mantenende raportos bonos cun Turchia e Israele. E in Iran? Cale si siat cosa chèrgiant tocat a cumpèndere in antis ite cherent sos àteros. Pro sos Ayatollah, ma fintzas pro su fìgiu de su Scià, sa chistione printzipale est s’integridade de s’Iran. Duncas chi non si lasset logu a cale si siat protzessu de autodeterminatzion. Su perìgulu, in urtimera, est chi a sos curdos iranianos los tratent comente si faghet cun sas pedinas in sas iscachieras. E di Karl Kraus narait chi sos pòpulos sunt sas vìtimas de una diplomatzia che chi custa esseret una partida de iscacos, ite at a èssere cun sa gherra.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment