Su Senadu de sa Repùblica at naradu su primu “sì” a su disinnu de lege contra s’antisemitismu. Su votu de su sero de oe at contadu 105 votos favorèvoles, 24 contra e 21 astensiones. Sa proposta como depet colare a sa Camera de sos Deputados pro divènnere lege.
Su DDL firmadu e batidu a dae in antis dae su leghista Massimiliano Romeo est resèssidu a partzire s’opositzione. Difatis, si sa dereta at votadu totu canta pro s’eja, lis ant fatu cumpangia Italia Viva, Azione e chimbe senadores de sas Autonomias. A s’imbesse su Movimento 5 Stelle e AVS ant votadu contra. In su mentres su Partidu Democràticu at seberadu s’àndala de s’astensione, chi però no ant sighidu sos tzentristas, comente Graziano Delrio e Pier Ferdinando Casini, chi ant votadu paris cun sa dereta.
Sas raighinas de custa solobradura naschent dae sa timoria chi custa lege diat pòdere èssere una manera pro corfare sas movitias e sas paràulas contra a su guvernu de Israele. Su perìgulu est cuadu in s’impreu de sa definitzione de s’antisemitismu elaborada dae s’IHRA, s’Alleantzia Internatzionale pro s’Ammentu de s’Olocàustu chi l’inditat comente unu pensu a subra de sos Ebreos chi podet essire a campu comente òdiu contra de sas persones, de sas istitutziones e de sas propiedade issoro. Una fràsia chi, si podet andare bene in un’allega teòrica, non podet serbire pro una lege, ca est tropu ampra. Difatis finamentas Amnesty International Italia at espressadu su pidinu suo pro su seberu, ca b’at s’arriscu de la fàghere divènnere unu traste de tzensura de cale si siat crìtica a sa polìtica de Israele.
Si est beru chi sa norma l’ant unu pagu mudada boghende·nche una proibida a sas manifestatziones cun sìmbulos o messàgios antisemitas e s’inteteramentu de sas penas; est beru fintzas chi at galu intro su fràigu de una banca de datos cun sas acontèssidas cunsideradas crìmines de òdiu, sa sensibilizatzione in su servìtziu pùblicu radiotelevisivu, e s’eliminatzione de cuntenutos antisemitas dae sas retzas sotziales.
Una lege a duas caras chi si dae una banda narat chi cheret amparare una minoria, dae s’àtera paret sighire una lògica de repressione e controllu.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment