S’editzione 2026 de su Mobile World Congress est comintzada su 2 de martzu in Barcellona (https://www.mwcbarcelona.com) marchende unu càmbiu de paradigma: barigada sa fase mìnima de sa velotzidade de connessione, s’indùstria de su setore punnat como a una calidade de sa rete chi movet dae sa capatzidade de elaboratzione autònoma.
Est pro custu chi su tema tzentrale de ocannu, seberadu dae sos organizadores de sa Gsma (Global System for Mobile Communications Association), est “The IQ Era”: non prus connetividade ebbia ma fintzas e mescamente intelligèntzia distribuida; non prus “cantu sunt lestros sos telefoneddos nostros?” ma “cantu sunt capatzes de traballare pro nois?”. Su protagonista tecnològicu de custa editzione est duncas s’Agentic AI (IA Agèntica).
Si su 2025 amus imparadu a chistionare cun sos chatbot, dae como is susu sos “agentes” sunt operativos. Gigantes comente Samsung (cun sa sèrie Galaxy S26) e ZTE sunt presentende sistemas integrados chi non rispondent ebbia a sas dimandas, ma manìgiant secuèntzias operativas dinàmicas: dae sa prenotatzione de viàgios multi-tapa a sa gestione autònoma de sas iscadèntzias professionales. Flussos elaborados deretu in su dispositivu gràtzias a protzessores noos cun consumu bassu (comente su MediaTek Dimensity 9500). De prus: mancari su 5G-Advanced siat intrende a regime prenu, su Mwc 2026 est oferende sas primas miradas a su 6G. Sa novidade non pertocat petzi sa banda millimètrica, ma sa chi li narant Physical AI, est a nàrrere s’integratzione de s’intelligèntzia artifitziale cun su mundu fìsicu. Ma àteru b’at. Comente sos protòtipos de “Robot Phone” (annuntziados dae Honor) e sos drones chi impreant sa rete non pro trasmìtere vìdeos ebbia ma fintzas pro “intèndere” s’ambiente perimetrale pro mèdiu de sensores integrados in sas turres ràdio (tecnologia ISAC).
Gianfranca Orunesu
_______________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22