Amus faeddadu de Tzipru pagas chidas a como, cando nemos (o belle nemos) podiat immaginare chi sas bases britànnicas de cussu logu podiant èssere còrfidas dae drones iranianos. Tzipru est un’ìsula mediterrànea che a sa nostra. Prus minuda, prus a oriente. E fintzas nois b’amus bases militares istràngias e ostiles a sa repùblica islàmica suta atacu custas dies. Pro ite naramus custu? Ca est dae su comintzu de custa fase bèllica noa chi in sa rete bundant sas dimandas pro cumprèndere si sos mìssiles de Teheran potzant lòmpere o mancu a su territòriu de s’istadu Italianu. Non tenimus datos pretzisos pro su chi pertocat s’arsenale issoro. Non nde connoschimus nen sos isvilupos tecnològicos, nen sas pèrdidas sufridas pro more de s’operatzione israeliana de su 2025. Ma si est beru chi sa distàntzia màssima est sa de 3mìgia chilòmetros, tocat a ischiremus chi bi nd’at 2840 e pagu prus dae sa base de Tabriz (in su Nord-Ovest de su paisu) a Roma. Nois istamus prus a ovest in custu Mediterràneu e, in teoria, non diamus dèvere àere perìgulu de nde retzire. Forsis nemmancu Roma. Ca nessi pro como dae sa repùblica islàmica tenent àteros obietivos. De cada manera sa de sas bases militares in Sardigna est un’allega chi non podet èssere derubricada. Gasi comente non podet èssere derubricada s’allega de sa dipendèntzia petrolìfera. Non cheriat derubricada eris, non cheret fatu oe chi sunt serrende s’istrintòrgiu de Hormuz blochende petroleras e faghende crèschere sos prejos (e galu no ischimus finas a cantu). Gherra e fòssiles, est cosa chi ischimus, andant a manu tenta. Pro sos fòssiles gherramus e gherrende illiberamus cantidades mannas de co2. Finas sa ricostrutzione (in Ucraina, in Gaza, in totue) pedit meda energia, e meda incuinat. Ma si gherra e fòssiles andant a manu tenta, nois a manu tenta de chie istamus?
mauro piredda
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment