Sa relata de oto de sa Fundatzione Antìgone a subra de sas presones minoriles (inoghe) contat de unu disacatu: a pustis de su decretu Caivano, a lenu a lenu, custos logos sunt divènnidos logos de castigu e non de imparu e de recùberu, comente fiant a dae in antis. Pro sa prima borta custa genia de càrtzeres sunt tropu prenos, in tres annos ebbia sos arrestados sunt crèschidos de su 50%: dae 381 a 587, ma in su matessi tempus su dinari pro custas istruturas, e pro sos traballadores issoro, sunt menguados de prus de su 1%.
Sas cunseguèntzias sunt istadas chi si traballat peus ca su personale educativu est de mancu pro prus gente. Su raportu nou intre bàrdias e cartzerados at peoradu s’ambiente e sunt istados documentados abusos e violèntzias de sos mannos contra a sos pitzinnos. In prus, sigomente b’at prus pagu logu, sos pitzinnos sunt batidos dae un’istrutura a s’àtera perdende·si sa possibilidade de unu percursu de recùberu fatu a sighidura e a costàgiu de sas famìllias. Sa situatzione est gasi grae chi, pro sa prima borta, ant dèpidu abèrrere setziones pro pitzinnos in unu càrtzere pro mannos. In sas tzellas sos giòvanos istant male tantu chi sunt ismanniados sos nùmeros de autolesionismu e de s’impreu de antidepressivos e, a dolu mannu, unu pitzinnu de deghessete annos s’est finamentas ochidu.
Bisòngiat de lu tènnere a mente: su decretu Caivanu narat de arrestare su giòvanu fintzas pro reatos lieros. Ma b’aiat bisòngiu de custu inteteramentu de sas leges? Sos nùmeros de sos crìmines minoriles denuntziados fiat menguende de su 4% in 2023, un’annu chi sighiat s’andanta de sos annos a dae in antis. In prus, sa mèdia UE de s’ìnditze de sos crìmines minoriles est de su 647.9 cada 100 mìgia abitantes, cussu italianu est meda prus bassu, petzi 363,4. Non b’aiat e non b’at un’apretu seguresa in contu de pitzinnos, sa situatzione noa naschet dae unu sèberu polìticu.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment