Oe in s’atòbiu IA e lavoro: governare la trasformazione, moltiplicare le opportunità strategie, fiducia, regole, competenze, at faeddadu sa Presidente de su Cussìgiu, Giorgia Meloni, in contu de intellighèntzia artifitziale. Segundu a issa s’Itàlia si podet leare unu rolu in sa rivolutzione tecnològica, ca giughet resursas e cumpetèntzias, e chi tocat de pònnere règulas èticas pro non corfare sos traballadores de su tzetu mèdiu e sighire a tènnere in su tzentru se s’isvilupu sa persone. Sas timorias sunt sas matessi chi at istèrridu Pignataro (inoghe). Su messàgiu paret però una decrarada de isperas, prus chi no una promissa, chi in su mundu de sa polìtica cheret nàrrere de a beru pagu.
Sas fràsias de Meloni lompent sas matessi dies chi in sos USA su guvernu est dende un’ultimatum a s’azienda de IA Anthropic: Trump cheret sas intellighèntzias artifitziales a suta de su poderiu suo, ca su disinnu est de las pònnere intro de sas armas e de las impitare, sas IA, pro compidare sa populatzione istadunidensa. S’azienda chi produit Claude non lu cheret fàghere e at denegadu cale si siat abertura a custos setores. Sas chimas de su guvernu ant decraradu però chi non si podet sighire règulas èticas peruna, cando tocat de si defèndere dae sas minetzas de su benidore. Custu est su surcu de una genia noa de gherra frita.
Sos investimentos de sos guvernos prus potentes in custu setore sunt mannos de a beru: energia, dinari e amparu legale, ma finamentas controllu. Comente at a fàghere s’Itàlia a sa sola, e tzuchende prus a tardu, a si aparinare cun sa Tzina e sos Istados Unidos? Comente at a fàghere un’Istadu minore a proibire carchi cosa si custu est s’apretu? Comente diat fàghere a sustènnere unu setore chi mànigat risursas maicantas, cando non at soddos pro sas fainas fitianas? Su chi ispantat, o forsis nono, est s’impreu de unu limbàgiu natzionalìsticu e non comunitàriu. In sa parlata, difatis, s’Europa no l’at mentovada.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment