Foto leada dae irishrugby.ie
In su de tres turnos de su Ses Natziones, sa prima partida, sàbadu 21 in Twickenham, at bidu s’Irlanda vitoriosa contra a s’Inghilterra finas in manera ispantosa: 21-41.
Giai a su 9’ sos irlandesos fiant in bantàgiu cun punitzione de Crowley. A coa, a su 20’, est arribada sa meta de su medianu de mìschia Gibson-Park (in foto). Mancu deghe minutos a pustis est arribada ateruna meta pro more de McCloskey chi est intradu in sa difesa inglesa permitende a Gibson-Park de dare a l’ala Baloucoune pro àteros 5 puntos.
Su bìndighi de sa Rosa s’est atzapadu finas cun unu giogadore de mancu pro su grogu a Stuart. A sa mesora de giogu, cun sa meta de O’Brien, subentradu a Lowe, e sa trasformatzione s’Irlanda fiat 22-0. In finale de tempus sos primos puntos inglesos cun sa meta trasformada de Dingwall. In sa segunda metade sos irlandesos ant mantènnidu su controllu, marchende metas cun Sheehan e Osborne. Inùtiles sas metas inglesas de Lawrence e Underhiil.
Totus duas sas iscuadras ant giogadu deghe minutos in 14 pro sas ammonitziones in antis de s’inglesu Pollock e a pustis de s’irlandesu Osborne. De signalare in su primu tempus sa sostitutzione pro infortùniu de s’àrbitru italianu Piardi cun su signalìnias frantzesu Brousset.
In s’àtera partida de sàbadu su Galles, finas a como sa peus iscuadra, at dadu traballu meda a s’Iscòtzia. Mancari in 14 giai in cumintzu de partida pro s’ammonitzione a Hawkins sos dragones ant marcadu sa meta cun su pilone Carré a su 10’. S’Iscòtzia at rispostu luego cun Steyn ma su Galles at torradu a marcare cun s’ala Adams: 17-5 a sa fine de su primu tempus. In sa ripresa sos iscotzesos ant cumintzadu a recuperare e a pustis de 27 fases de giogu sunt andados in meta cun Russell.
Su Galles at fatu àteros tres puntos de punitzione cun Evans e a in deretura dae sa ripresa de su giogu Russell at piscadu in profundidade a l’ala Graham pro ateruna meta. Su sorpassu est bènnidu a chimbe dae sa fine cun Turner, dae maul. Finale 23-26.
Domìniga sero in Lilla sa Frantza at rispetadu su pronòsticu, finas si sena de dominare s’Itàlia. In sa prima mesora sos frantzesos aiant giai marcadu tres metas, sa prima cun Bielle-Biarrey serbidu in profundidade dae Dupont, sa segunda de fortza de Meafou, sa de tres de Ramos, ischieradu a s’abertura pro s’assèntzia de Jalibert. De Capuozzo sa prima e ùnica meta italiana.
In su segundu tempus sos frantzesos, aprofitende de s’ammonitzione a Lynagh, ant marcadu torra in sos ùrtimos deghe minutos cun sos trescuartos Drean, a s’esòrdiu, e Gailleton, e sas trasformatziones de Ramos. Finale: 33-8.
Totus sas iscuadras chi ant bintu ant otènnidu su puntu de bonus ofensivu.
(gianni muroni)
Leave a comment