Si in s’artìculu coladu amus faeddadu de “stripare” sas fotografias publicadas in sas retes sotziales, un’àteru tipu de strip est ogetu de allega in custas chidas. Protagonista est Grok, s’intelligèntzia artifitziale de cussu Elon Musk chi sighit interpretende su cuntzetu de “libertade de espressione” in forma prus chi non literale.
S’iscàndalu chi est agitende sas abbas in Bruxelles pertocat sa fatzilidade de pòdere “ispogiare” sa dignidade de chie si siat cun pagas manadas de algoritmu. Semus faeddende de belle tres milliones de immàgines de fèminas, fintzas minorennes, chi Grok nde lis at bogadu sas bestes de subra e de suta sena su cunsensu issoro. B’at àpidu duncas una valanga de deepfake pornogràficos chi ant fatu dannu mannu. E custu dannu sighit mancari sos isvilupadores de xAI apant dèvidu introduire carchi restritzione a su modellu generativu issoro.
S’acontèssida, chi comente amus a bìdere no est s’ùnica, at abertu duncas unu fronte nou in Europa. Si sas tech companies cheriant a torrare a bìdere s’Ai act pro nde fàghere unu regulamentu prus pagu tèteru, como b’at chie lu cheret emendare in forma restritiva (birdes e sotzialistas, mancari cun duas propotas diferentes) pro impedire custas pràticas. Chi non sunt limitadas a Grok. B’at nessi àteras 55 aplicatziones pro ispogiare sas persones a disponimentu in su Google store e àteras 47 in s’App store de Apple. Custu cheret nàrrere milliones de downloads e milliones de faturadu. «Sas app – identificadas dae Tech Transparency Project – las ant iscarrigadas prus de 705 milliones de bortas in totu su mundu e ant ingendradu unu faturadu de 117 milliones de dòllaros. Sende chi Google e Apple tratenent una pertzentuale de custu faturadu, issos etotu b’ant unu profetu diretu dae s’atividade de custas app». Su votu de custos emendamentos est programmadu pro su 18 de martzu.
Gianfranca Orunesu
(Foto de Cottonbro Studio)
Leave a comment