Su maestrale faghet a timire, Tàtari serrat sos parcos

Tàtari s’aprontat a s’acarare a su tempus malu. In sa fache nord-otzidentale de Sardigna est arribende una temporada chi at a batire bentos de traschia e mare bulugiadu, ispinghende s’amministratzione comunale a si dare ite fàghere pro sa seguresa de sos tzitadinos. Su sìndigu Giuseppe Mascia at firmadu un’ordinàntzia chi òbligat a sa serrada repente de totu sos parcos e de sos giardinos tancados e, in prus, su divietu de intrare in sas àteras àreas birdes. Sas mesuras de seguresa ant a restare in pee dae sas 13 de oe (19 de freàrgiu) a sas 15 de su 20.
Sas previsiones meteorològicas descrient unu iscenàriu crìticu: currentes fortes de ovest/nord-ovest ant a mundare su territòriu cun ufuladas chi diant podere israighinare àrbores, fàghere rùere naes e fàghere dannos a fràigos. Pro gestire s’emergèntzia, est istadu ativadu su Tzentru Operativu Comunale (COC), chi at compidare sa situatzione h24.
L’amministratzione at dadu a ischire a sa tzitadinàntzia de evitare de si firmare suta de àrbures mannos o in àreas perigulosas. Sa protetzione tzivile ispetzìficat chi su perìgulu est artu, mescamente in sos giassos in ue s’agatat linnamine betzu.
Pro mantènnere sa seguresa in sos cantieres e in sos locales pùblicos, si preguntat unu rigore particulare in sos setores de s’edilìtzia e de sas mercantzias. L’ordinàntzia disponet traballos in artura: si depent serrare sas atividade subra pontes o coberturas in presèntzia de bentu forte; b’at òbligu de verificare sas acapiaduras pro grues, pontes e telones; sos meres de bar e restorantes depent bogare o pònnere in seguresa dehors, paracos mannos, gazebo e arredos de foras chi diant podere èssere de perìgulu.
Prudèntzia màssima est pedida fintzas in sas costas. Mare in bulùgiu est prevìdidu in su chirru de Portu Ferru e de s’Argentiera. Est arriscadu puru a s’acurtziare a molos, iscollieras e digas. Sa Politzia Locale, paris a sos Barratzellos e a sos voluntàrios, s’at a mòvere pro chi neune intret in sos tretos a riscu de allagadura.