Foto leada dae scottishrugby.org
Sàbadu 14 su Ses Natziones fiat in iscena in Irlanda e Iscòtzia. In Dublinu s’Itàlia est partida male abarrende in 14 giai in sos primos minutos pro s’ammonitzione de Lynagh e leende sa meta irlandesa dae s’estremu Osborne. A coa però sunt istados sos italianos a s’atzapare in superioridade numèrica pro su cartellinu grogu a su medianu de mìschia Casey. Su primu tempus est finidu duncas 10 a 5 pro more de sa meta, trasformada, de Nicotera.
In sa ripresa sos irlandesos ant realizadu luego una meta cun su nùmeru 8 Conan e sunt megiorados cun sos càmbios in mediana cun Gibson-White e Crowley in sostitutzione de Casey e Prendergast, partu in die mala.
In sos minutos finales s’Itàlia at chircadu de paregiare cun un’atzione multifase ma Lowe at intertzetadu unu passàgiu de Ioane giughende·si s’iscuadra in fatu finas a s’àrea de meta aversària, in ue sa partida est finida. Finale 20-10.
In Edimburgu fiat in pàliu finas sa Calcutta Cup, su trofeu intre sas duas natzionales prus antigas, Iscòtzia e Inghilterra.
Sos iscotzesos at marcadu duas metas giai in sos primos bìndighi minutos, cun su tzentru Jones chi at regortu unu passàgiu de su medianu de mìschia White, illonghiadu cun sa punta de sos pòddighes dae s’abertura Russell, e cun sa tertza lìnia Richie, piscadu in positzione de ala dae su capitanu Tuipulotu. Su bìndighi de su cardu at isfrutadu in custu modu s’ammonitzione a s’ala inglesa Arundell, chi, torradu in campu, at marcadu sa prima meta bianca.
Un’atzione de Russell, chi s’at isfrancadu tres placàgios e tiradu de pee, at permìtidu a White, chi at aprofitadu de sa faddina in ritzetzione de Genge, de marcare àteros 5 puntos. In antis de s’intervallu Arundell est istadu torra punidu, custa borta cun s’espulsione, lassende sos suos in 14 pro 20 minutos.
A su minutu 53 Matt Fagerson, intradu dae sa panchina, at intertzetadu unu drop de s’abertura Ford e at passadu luego a Jones (in sa foto) chi cun su campu lìberu at marcadu a suta de sos palos assegurende sa Calcutta Cup a s’Iscòtzia. Inùtile sa segunda meta inglesa de su nùmeru 8 Earl. Finale: 31-20.
S’ùrtima partida, sa de domìniga 15 in Cardiff, est andada segundu pronòsticu, cun sa Frantza tropu superiore a su Galles. Sos istràngios ant marcadu oto metas, tres in sos primos bìndighi minutos, cun Gailleton, Bielle-Barrey, Brau-Boirie, Jalibert, Marchand, Attissogbe duas bortas, e Ollivon. Pro sos gallesos metas de su pilone Carré a su minutu 19 e de Grady, in finale de partida, a su 79’. Finale: 12-54.
Frantza prima in classìfica cun 10 puntos e Iscòtzia segunda a 6.
(gianni muroni)
Leave a comment