Su logu fiat su de su summit de cussa Addis Abeba chi unu tempus fiat su tzentru de s’Àfrica orientale italiana. Ma sos temas de cussu addòbiu los at derubricados Giorgia Meloni matessi boghende·nde dae su tzilindru sa fòrmula chi nch’aorat sa Fomo sua (fear of missing out) in riferimentu a su Board of peace de Trump. S’Itàlia nât chi b’aderit comente osservadora. Una mossa pro non pagare sa cuota de ingressu de unu milliardu de dòllaros (prerechisitu pro èssere sòtzios permanentes) e pro nche barigare sos impèigos costitutzionale (custa Costitutzione, semper in mesu de ancas…). Custu Board peace, presentadu in forma ufitziale su mese coladu in Davos no est s’Onu noa, ma un’organismu privadu de gestione post-bèllica cun sa regia de cumandu in Washington. O in Mar-a-lago, sende chi Trump l’at a ghiare fintzas cando no at a èssere prus presidente. Punna de custu Bop est sa de torrare a fraigare, comintzende dae Gaza, a pustis de àere contribuidu a ghetare a terra su chi b’aiat. Un’ispètzia de sotziedade de investimentu coloniale, duncas, in ue s’istatutu permitit de achirire, gestire e bèndere benes immòbiles. Un’operatzione massissa de real estate – in finitias – in ue famìlia e afàrios nde sunt pilastros: figuras de primu òrdine de custu grustu de “òmines de paghe” sunt su ghènneru de Trump Jared Kushner e s’immobiliarista Steve Witkoff. Bengiamus a nois. Sa Costitutzione (artìculu 11), in prus de ripudiare sa gherra, «permitit, in cunditziones parìviles cun sos àteros Istados, sas limitatziones de sovranidade netzessàrias a un’ordinamentu chi asseguret sa paghe e sa giustìtzia intre sas Natziones; promovet e favorit sas organizatziones internatzionales orientadas a tale iscopu». In sos contos de Meloni s’Itàlia non tzedit sovranidade e non firmat tratados vinculantes cun passàgios parlamentares. Su messàgiu est a sas impresas pro lis lassare unu logu in prima fila in sos apaltos.
mauro piredda
Leave a comment