Su grupu Stellantis chenàbura colada at pèrdidu unu cuartu de sa balia sua in sa bursa, su 25% in mancu de su tìtulu. Custu pro neghe de una comunicatzione ufitziale de sa sotziedade chi ponet in paris Fiat, Citroën, Peugeot e àteras marca de veturas chi naraiat a craru chi, a pustis de sèberos faddidos, sos balàngios de ocannu si nche sunt minimados gasi meda, chi Stellantis no at a resissire a dare dinari a sos investidores. Su problema est istadu chi su grupu at incumintzadu tropu a tardu a s’istesiare in su setore de s’elètricu, proende a s’istichire in unu mundu chi fiat andadu tropu a dae in antis. Como su pianu nou est prus o mancu de non cambiare, torrende a su connotu. A dolu mannu però custas acontèssidas ant a corfare traballadores e fàbricas chi traballaiant cun Stellantis.
In su mentres, fintzas su grupu GEDI no est nadende in abbas chietas. Su grupu, difatis, est bendende a àteros grupos editoriales «la Repubblica», sas ràdios Capital, Deejay e M2O e «La Stampa». Custu paret chi siat fintzas in arriscu de tancare ca a sa propiedade noa lis at a bastare unu giornale ebbia. Mescamente sos giornalistas de sa Repùblica si sunt chescende dae meda, ca dae cando sos Elkann l’at comporadu sa lìnea editoriale si nch’est imbrinugada a sa publitzidade e a fàghere pragheres a sos potentes. Una lìnea chi no est agradende a sos letores chi, pro su prus de cultura de manca, sunt menguende annu cun annu.
Ambas duas sas sotziedades sunt de sa famìllia Elkann, chi at leadu s’erèntzia de sos Agnelli. In sos annos ant ismanniadu sa presèntzia issoro in su mercadu internatzionale de sas veturas e in s’editoria italiana, ma a su matessi tempus ant lassadu a dae segus s’Itàlia, cussa chi pro annos medas lis at dadu soddos maicantos e sustegnu a sas polìticas industriales contra a sos traballadores. Como est craru chi s’istrategia sighida no fiat gosi atinada, ma comente a semper no ant a èssere sos Elkann a pagare, ma sos dipendentes issoro e sa sotziedade intrea.
Gabriele Tanda
Leave a comment