A lassare su tatzone no est semper una cosa bona e giusta. E si sos giòvanos bufant semper prus pagu, b’est chie s’est aprontende a lassare in domo maigantos traballadores: sa Heineken, su primu produtore de birra in Europa e su segundu in su mundu, at dadu a ischire chi intro de duos annos at a licentziare chimbe o ses mìgias dipendentes. A pèrdere su postu non ant a èssere ebbia sos operàios, ma fintzas chie traballat in sos ufìtzios, ca diat èssere netzessàriu minimare sas essidas de sos istipèndios peri s’impreu de s’intelligèntzia artifitziale.
Dae su chi nàrant sos datos istatìsticos, a sa Generatzione Z non li praghet a bufare. O, pro mègius nàrrere, a bufare alcolicos. In Amèrica, su vinti pro chentu de sos nàschidos a pustis de su 1995 bufat cun regularidade, seberende bèbidas analcòlicas o cun pagas calorias.
Custu mudamentu generatzionale at custrintu sa multinatzionale olandesa, fundada in su 1864 in Amsterdam dae Gerard Adriaan Heineken, a una furriada lestra: prus paga produtzione traditzionale e prus investimentos in sas lìnias “Zero Alcol”. Un’adatamentu netzessàriu chi però presentat unu contu caru meda de postos de traballu.
In su 2017 Heineken teniat 165 giàssos de produtzione in setanta natziones e prus. Fintzas in Itàlia, in ue sa sotziedade cuntrollat marcas sìmbulu che a sa Moretti e s’Ichnusa, b’est chie tenet s’alenu curtzu e su pistighìngiu est forte. Su grupu amministrat bator istabilimentos de importu, chi sunt Assemini (Casteddu), Comun Nuovo (Bergamo), Massafra (Taranto) e Pollein (Aosta). Cun prus o mancu duamìgia dipendentes in totu Itàlia, sa timòria est chi sa istrale de Amsterdam potzat rùere fintzas in su tzugru de sas lìnias produtivas de ecellèntzias locales, che a sa Birra Messina o a sa sarda Ichnusa. Pro como non bi sunt cunfirmas ufitziales, ma su printzipale (AD) de s’azienda, Dolf van den Brink at faeddadu craru: perunu istabilimentu internatzionale si podet nàrrere seguru.
Abbaidende sos nùmeros, però, s’arrivit a una duda pro su chi pertocat sa salude finantziària. Mancari sas bèndidas siant faladas de su 1,2 pro chentu, Heineken at serradu su 2025 cun vintinoe milliardos de èuros de intradas, cun un’ùtile operativu prus artu de su chi su grupu si podiat isetare. E su miràculu l’at fatu sa Borsa, respondende sena dolu a sos licentziamentos: su tìtulu est pigadu de su 3,9 pro chentu, premiende su sèberu de reduire sos costos de su personale pro amparare sos balàngios. In sos pranos artos de s’azienda ant cumpresu chi tocat de mudare sas produtziones prima chi su mercadu los càtzighet.
Bobore Taras
Leave a comment