Fotografia leada dae ffr.fr
Sa de 132 editziones de su Torneu de sas Ses Natziones de rugby est cumintzada cun s’antìtzipu de giòbia 5 de freàrgiu. In s’Estade de France de Parigi, a suta de s’abba, sa Frantza campione in càrriga at bintu, sena de tropu problemas, a s’Irlanda. Sa formatzione tzèltica at cunfirmadu de èssere in una fase de crisi neghe de su ricàmbiu generatzionales de sos giogadores.
Sos transalpinos imbetzes, cun su capitanu Dupont, su cherbeddu de s’iscuadra, torra in campu a pustis de belle un’annu, ant serradu sa partida giai in su primu tempus. Protagonista, galu una borta, s’ala manca Bielle-Biarrey, chi at marcadu duas metas, sa prima isfranchende·si tres placàgios a fila a pare e sa segunda regollende unu passàgiu de pee de s’estremu Ramos. Sas àteras marcaduras sunt istadas de s’abertura Jalibert (in sa foto), cun passàgiu de Dupont, e de sa segunda lìnia Olivon a pustis de un’atzione corale a sa manu.
Sos irlandesos ant marcadu duas metas in su segundu tempus, cun Tominey e Milne, ma fiat tropu tardu. In sos ùrtimos minutos s’ala destra frantzesa Attissogbe at fissadu su resurtadu in 36-14.
In sa prima partida de sàbadu 7 s’Itàlia, a pustis de àere marcadu duas metas in sos primos bìndighi minutos, at mantènnidu su bantàgiu contra a s’Iscòtzia in unu campu de s’Olìmpicu allagadu. De sos trescuartos Lynagh e Menoncello sas metas italianas, de su nùmeru 8 Dempsey s’iscotzesa. Resurtadu finale 18-15.
In fines, in Twickenham s’Inghilterra at otènnidu una vitòria leve contra a su Galles chi sighit a passare sa peus fase negativa de s’istòria sua. De signalare sas tres metas de s’ala Arundell, chi cherent agiuntas a sas de s’àtera ala Roebuck, de su nùmeru 8 Earl e de su tzentru Freemane; de s’ala Adams cun passàgiu de pee de s’abertura Edwards sa meta pro sos gallesos. Finale: 48-7.
Ùnica nota positiva pro sos dragones Rees-Zammit, ischieradu dae Tandy in positzione de estremu, issu chi naschet ala, torradu a giogare in natzionale in atòngiu a pustis de àere tentadu, cun pagu sorte, s’aventura in su football NFL americanu.
Custu su regulamentu: 4 puntos a vitòria, 1 de bonus ofensivu pro chie marcat nessi 4 metas, 1 de bonus difensivu pro chie perdet cun non prus de 7 puntos de diferèntzia, 2 pro su parègiu.
(gianni muroni)
Leave a comment