Como chi sas àulas de sa facultade de Istùdios umanìsticos si sunt animende pro su semestre nou, unu cursu prus chi no originale est comintzadu giughende·nche a sos bancos universitàrios s’ètica de s’autoprodutzione. “Do it yourself: Introduzione all’etnografia del punk e all’autoproduzione musicale” est unu laboratòriu coordinadu dae su Prof. Ignazio Macchiarella chi marcat un’addòbiu inèditu intre s’acadèmia e sa cultura underground. Su progetu didàticu, calendarizadu pro custu mese de freàrgiu, no est petzi istòria de sa mùsica; s’obietivu est su de frunire un’introdutzione crìtica e metodològica a s’istùdiu de sa popular music contemporànea, mescamente in contu de culturas punk e hardcore.
Su laboratòriu oferit a sos dischentes sos istrumentos teòricos e etnogràficos pro cumprèndere sas iscenas musicales locales e translocales. In totu custu, su DIY (Do It Yourself) essit a campu comente una pràtica culturale e polìtica de autonomia artìstica. Tutore de su cursu est s’etnomusicòlogu e musitzista Diego Pani, chi nche giughet a Sardigna sas letziones giai fatas in sa University of New Mexico de Albuquerque, in sos Istados unidos. In sas 25 oras de atividade s’ant a intreverare momentos de didàtica frontale clàssica (comente iscurtu ghiadu e s’analizu de documentos audiovisivos) e pràticas de chirca ativa e creativa. Totu s’at a serrare cun s’aprontu de una produtzione editoriale cumpartzida: una fanzine colletiva dedicada a s’iscena musicale casteddaja.
Diego Pani, chi a su presente est dotorandu de etnomusicologia in sa Memorial University of Newfoundland, si leat in fatu suo fintzas sas cumpetèntzias musicales esecutivas e produtivas sende chi est boghe e frontman de sos King Howl e fundadore de s’eticheta discogràfica Talk About Records. Est fintzas pro custu chi su de s’autoprodutzione no est ebbia unu cuntzetu o un’idea (narende·la cun Gaber), ma una forma cuncreta de espressione e resistèntzia culturale. Duncas, in tempos chi sa mùsica est semper prus lìcuida e digitale, s’Universidade de Casteddu iscummitet in su recùperu de sa materialidade e de sa dimensione comunitària oferende a sos istudiantes suos un’ocasione rara pro indagare sas pràticas, sas estèticas e sos linguàgios de sa popular music cuntemporànea.
Gianfranca Orunesu
In s’immàgine, sa fanzine de Albuquerque (foto de Diego Pani)
Leave a comment