Su prus istadu mannu de Amèrica, su Cànada, est bivende unu momentu polìticu particulare e delicadu. A unu chirru ddoe sunt sas decraratziones, non s’ischit cantu provocatòrias, de su presidente istadunidensu Donald Trump, chi faeddat de un’annessione bighinu a s’Unione, a s’àteru ddo’est su malumore e s’insoddisfatzione pro su guvernu federale in duas provìntzias, una a est e una a ovest.
In Quebéc, terra francòfona, ant a votare pro su guvernu provintziale su 5 de santugaine. Sas inchiestas eletorales de opinione pro como dant comente binchidore su Parti Québécois. Si si diat votare oe, cunforma a sa mèdia de sos diferentes sondàgios, de su 3 de freàrgiu, custu partidu diat leare su 33% de sos votos. In segunda positzione ddo’est su Parti Liberal Québécois, cun su 25%. A coa benint Coalition Avenir Québec , Parti Conservateur du Québec e Québec Solidaire.
Intre sos puntos de su programma de su partidu ghiadu dae Paul St-Pierre Plamondon ddo’est sa cunvocatzione de unu referendum pro s’indipendèntzia de fàghere intro su 2030. Diat èssere su de tres, a pustis de sos de su 1980 e de su 1995. In su primu su nono a sa creatzione de un’istadu nou fiat istadu de agiumai su 60%. In su segundu pagu prus de su 50.
S’àtera parte de s’istadu a èssere avolotada est s’Alberta. Inoghe, Cànada sudotzidentale, sas resones pro su disìgiu de indipendèntzia non sunt ètnicas e linguìsticas ma prus econòmicas e polìticas. Sa provìntzia est a majoria cunservadore e pagu suportat sas polìticas progressistas de sa federatzione. In prus ddo’est su fatu ca s’Alberta est unu territòriu ricu de risorsas naturales chi diant pòdere garantire s’autonomia dae Ottawa, bidu ca su prus de sos tràficos est cun sos Istados Unidos prus chi cun sas àteras provìntzias e territòrios canadesos.
A pedire su referendum sunt su Partidu Indipendentista e su Partidu Republicanu. Sa regorta de firmas pro ddu pòdere cunvocare est cumintzada in ghennàrgiu e at a acabbare in maju de ocannu.
(gianni muroni)
Leave a comment