In contu de càntigu a tenore b’at in Sardigna unu progetu chi a li nàrrere ambitziosu est pagu. E chi, tapa cun tapa, est animende unu bellu nùmeru de biddas e sa comunidade intrea de sos cantores, de sos chircadores e de sos amantiosos. Si a custu b’agiunghimus chi sa missione sua nch’est in intro de su nùmene seberadu e chi cada atzione acumprida est documentada pro mèdiu de sas tecnologias digitales noas, podimus cumprèndere chi non semus a dae in antis de unu progetu pensadu a sa lestra e a sa grussera tantu pro lu fàghere e pro nàrrere de l’àere fatu.
Amparu est unu pianu de tutela de custu patrimòniu immateriale Unesco de s’umanidade chi est aunende logos, generatziones, istiles, limbàgios e linguàgios. Su progetu, finantziadu dae sa Regione Sardigna cun sa lege 12 de su 2025 e postu in òpera dae s’Istitutu superiore regionale etnogràficu (Isre), est promòvidu dae unu ragrupamentu de contivìgiu chi rapresentat sa rete organizada prus manna in Sardigna. Cabu filera est s’assòtziu Campos (Coordinamentu de sas artes poèticas e musicales de traditzione orale de Sardigna), afiancadu dae sos partner operativos Assòtziu Tenores Sardigna (cun in intro 50 grupos) e Assòtziu Boches a Tenore (cun 25 realidades).
Una sinergia chi at pigadu forma in su tempus cun esèmpios mannos de collaboratzione interassotziativa e chi aunit 300 cantores e barda partzidos in nessi 60 biddas de sos chirros istòricos de su cantu. Ite totu b’at in intro suo? Un’indàgine sistemàtica de sas formas locales de cantu; laboratòrios didàticos in oràriu curriculare in sas segundàrias de primu gradu; fainas laboratoriales abertas a sas comunidades; cantadas in sos tzilleris; addòbios intercomunitàrios intre cantores de biddas diferentes.
In su mentres est sighende sa produtzione de su podcast “Modas”, un’archìviu sonoru in evolutzione chi collit sas boghes e sos contos de sos protagonistas. De prus: totu sos materiales audiovisivos prodùidos in intro de custas fainas los ant a carrigare in su portale www.a-tenore.org, pensadu comente una prataforma partetzipativa cun atzessu abertu pro s’istùdiu e sa divulgatzione. Sos concruos de custu caminu cumbinant cun su Fèstival de su Cantu a Tenore e cun unu libru.
Resèssida manna b’at àpidu su 15 de ghennàrgiu cun unu dòpiu apuntamentu nugoresu: una cunferèntzia internatzionale a mangianu in contu de protzessos de digitalizatzione (cun rapresentantes de Matzedònia de su Nord, Letònia, Portugallu, Geòrgia, Finlàndia, Estònia, Islovàchia e Croàtzia) e una rassigna pesperina in su Museu de su Costùmene. Su progetu est comintzadu su mese de santandria in Lodè, cun unu laboratòriu in sas iscolas mèdias e at a finire in beranu. Fintzas a como Amparu nch’est lòmpidu fintzas a sas biddas de Alà, Biddamanna Strisàili, Bitzi, Bono, Bortigale, Burtei, Busache, Fonne, Monti, Nule, Ollollai, Orgòsolo, Orune, Ovodda, Sèneghe e Silanos. Luego àteras fainas in Benetuti, Garteddi, Gavoi, Orthullè, Illorai, Lùvula, Mamujada, Norghiddo, Orane, Oroteddi, Torpè e àteras comunidades galu agiunghende·si a s’elencu.
Gianfranca Orunesu
Leave a comment