Su guvernu USA, a pustis de impèllidas mannas, at publicadu milliones de pàginas, fotografias e àteras genia de documentos de sos chi ant mutidu sos “Epstein files”. Intro b’at un’ispentuma de abusos a subra de pitzinnas e pitzinnos, retzas de trassas pro su controllu de sas persones e pianos polìticos pro bortulare Istados e democratzias. Un’inferru de malesa. Sos nùmenes chi si nd’agatant sunt unu muntone, e galu como non s’ischit de a beru ite nd’essit a campu: chie est vìtima, chie at carchi neghe e cale fiat su disinnu mannu a dae segus de sos responsàbiles.
Jeffrey Epstein at traballadu in sa finàntzia e at balangiadu maicantu dinari, at fraigadu ligàmenes istrintos cun sos òmines prus de importu de su mundu e at fintzas intritzadu raportos cun s’esèrtzitu de Israele e cun sa dereta istadunidensa. Custos duos parent sos chi ant isfrutadu de prus sos vìdeos e sas connoschèntzias de Epstein: ricatare persones cun sas immàgines de sos abusos chi aiant fatu, pro los fàghere pinnigare a sa voluntade de custos grupos de interessu. Intro forsis b’est puru sa Rùssia, ma su rolu suo no est galu craru, e forsis benit a pustis de acordos cun sos cunservadores americanos.
Steve Bannon, su teòricu de su trumpismu e chi paret amigu corale e sòtziu de Epstein, in sos documentos est impinnadu a sustènnere sas fortzas polìticas de dereta, mescamente europeas, pro indebilare sas democratzias de su Continente betzu e pro isciusciare s’Unione. In custu traballu su polìticu italianu chi s’est acurtziadu a su pianu, dae sas cartas, est Matteo Salvini, chi est mentovadu 22 bortas dae su nadale de su 2018 a su beranu de su 2019.
S’immàgine chi nd’essit dae sas paràulas de Bannon, però, non est cussa de unu sòtziu abbistu, ma de unu pitzinneddu de mòere a gana issoro. Difatis Epstein narat a Bannon: «Ispero chi tue siat sètzidu in sos ghenugros de Salvini», e isse li rispondet: «A su revessu», e isse li torrat a rispòndere «Ma isse non si nd’abìgiat. Ah, su poderiu de s’iscurigore».
Su pianu fiat craru: fàghere leare su 60% de sos sègios in su Parlamentu europeu dae sa Lega, dae su Front National e dae àteros partidos de dereta e a pustis guvernare s’Unione. Cando Bannon torrat a nàrrere a Epstein chi sa punna est a curtzu, su finantzieri rispondet: «chi Deus tèngiat dolu de sas ànimas issoro» e Bannon li torrat comente isceda: «Podimus ammanigiare nois sas cosas inoghe». Su votu de su 2019 iscontzat su giogu a sos duos trasseris, ma faghet cumprèndere a craru sos disinnos chi teniant a subra de sas concas nostras.
Gabriele Tanda
Leave a comment