In s’oru ‘e su ‘entu est sa de ses sìlloges poèticas de Antonello Bazzu. Autore de poesias in sardu e in tataresu, pro more ca est nàschidu in Tàtari dae babbu de Osidde e mama de Cossoine, Bazzu est dae semper unu de sos animadores de sa vida culturale de sa tzitade, massimamente pro su chi pertocat chistiones linguìsticas.
Custa ùrtima regorta, publicada in su 2025 dae sa Magnum Edizioni, ponet una in fatu de s’àtera, in òrdine cronològicu de iscritura, poesias chi marcant su passàgiu de su tempus. Nostalgia, ammentos e soledade sunt sos temas chi dant un’istrutura omogènea a su libru.
Ddo’est su dolu pro sa morte de s’ùrtima tzia, chi a pitzochedda aiat lassadu sa bidda nadia pro si cambiare a sa tzitade, cumintzende de gasi sa vida in sos sartos de Osidda pro dda finire in su mare de Portu Turres.
Ddoe sunt sos pensamentos pesados dae su mudore de una domo bòida. Ddo’est su torrare, cun s’ammentu, a sos logos de sa gioventude. Ddoe sunt, semper presentes sena de ddos dèpere a mala bògia ammustrare, sos afetos familiares.
Sunt presentes puru unas cantas miradas subra s’atualidade e in parte sa polìtica e, in su fundu, essit a pìgiu s’amore pro sa natura de s’autore, chi solet espressare, a prus che in sa pàgina iscrita, finas in s’atividade sua de fotògrafu amatoriale. Sua est difatis s’immàgine in sa cobertina de sa sìlloge.
In antis de calicuna de sas poesias s’agatant tzitatziones literàrias de sos poetes e iscritores de riferimentu de Bazzu: Khalil Gilbran, Konstantinos Kavafis, James Joyce, William Shakespeare, Oscar Wilde e su Santu Austinu de sas Cunfessiones.
Sos setanta cumponimentos tenent totus, pro sèberu de s’autore, sa tradutzione a costàgiu in italianu.
A introduire su testu ddoe sunt sas prefatziones de Giovanni Nuscis e de Giuseppe Tirotto, issos puru poetes.
(gianni muroni)
Leave a comment