Tres annos a pustis de s’ùrtimu discu suo, intituladu Animas, Beppe Dettori at publicadu Poni menti a me, essidu in su 2025. Est unu progetu musicale dedicadu a sa limba tataresa. Dettori at duncas materializadu su disìgiu chi teniat dae ora de fàghere unu discu totu in turritanu.
Su prus de sas cantzones, deghe de sas deghessete de su cd, sunt su frutu de sa collaboratzione cun su poete tataresu Mario Lucio Marras.
S’artista istintinesu, a prus de àere postu in mùsica sas poesias de Marras, at finas iscritu issu àteras cantzones, testu e totu. A cumpletare su discu ddo’at finas unu cumponimentu in sardu e unu in aligheresu.
Su filu condutore de Poni menti a me est sa tzitade de Tàtari, chi Marras figurat cun paràulas prenas a bortas de nostalgia, ma finas de amargura pro su tempus chi est passadu cambiende in peus giassos de sa pitzinnia sua, che a In chissu patiareddu, e a bortas de afetu, massimamente in Santu Nigora e in Lu patiu di lu diauru, dedicados a duos de sos logos prus càrrigos de istòria de su tzentru tzitadinu.
S’àtera cosa chi acàpiat a pare totu sas deghessete cantzones est sa limba, chi unit Romàngia, Flumenàrgia e Nurra.
E difatis in custu discu s’ex boghe de sos Tazenda at mutidu a collaborare àteros artistas de s’ala de Tàtari, cherende in custu modu dare una rapresentàntzia a totu custa ala de Sardigna.
Intre custos ddoe sunt su portuturresu Federico Marras Perantoni, chi cantat cun issu in E sogna, e sa tataresa Denise Gueye, chi dd’acumpangiat in I’ li diddi.
Ant collaboradu puru, sonende o cantende, sos Zeppara, sos Driven, Andrea Desole, Angelino Delogu, Giada Moschella, Giovannino Porcheddu, Martino Roggio, Andrea Pinna, Peppino Anfossi, Cristiano Caria, Marcello Canu e Pierpaolo Sechi.
Poni mente a me est una produtzione de su sòtziu Sa Perbeke e de su Rockhaus Blustudio, cun s’agiudu de Grimaldi Sardegna, Istitutu Bellieni e su patrotzìniu de sas Comunas de Tàtari, Sosso, Portu Turres e Istentinas.
(gianni muroni)
Leave a comment