Dae Bartzellona a Bruxelles b’at una batalla pro chi su catalanu siat sa de 25 limbas ufitziales de s’Unione europea. Est una batalla chi sighit e chi mustrat finas a ue podet lòmpere, in contu de rivendicatziones, unu movimentu linguìsticu natzionale petzi si lu cheret. In su mentres su catalanu no est galu ufitziale in s’istadu ispanniolu e duncas s’atividade legislativa diat pàrrere movende·si in diretzione contrària a sa punna mentovada a comintzu.
B’at una discriminatzione. Custu est su chi narant sos de sa Plataforma per la Llengua, chi pro s’annu in pessu coladu ant istèrridu unu bilantzu pagu lugorosu: in contu de normas istatales e europeas bi nd’at 185 de sas noas chi imponent s’ispanniolu a dannu de su catalanu, limitende·nde s’impreu e s’amparu giurìdicu. De sas 185 dispositziones mentovadas 118 las at emanadas s’istadu tzentrale e 67 derivant dae regulamentos de s’Unione europea.
Semus faeddende de un’architetura legale chi traballat in forma capillare: dae s’òbligu de etichetadura petzi in castillianu pro sos produtos alimentares e sas meighinas a sos rechisitos linguìsticos escludentes in sa giustìtzia e in sa pùblica amministratzione. Pro sa Plataforma non semus a dae in antis de fartas burocràticas ebbia, ma de una discriminatzione sistèmica chi negat a sos tzitadinos sa possibilidade de si pòdere relatzionare cun s’istadu pro mèdiu de sa limba materna issoro.
Mancari sas promissas de su guvernu de Madrid de fàghere a manera chi su catalanu siat reconnòschidu comente limba ufitziale de s’Ue, Bruxelles – sende chi s’ùnica limba ufitziale de Ispagna est su castillianu – sighit a bogare a campu regulamentos chi ignorant sa llengua. Duncas una comunidade de 10 milliones de locutores est obligada a consultare documentos in ispanniolu ebbia.
Custu cheret nàrrere, una bia de prus, chi unu contu est a fàghere retòrica polìtica, àteru est chi b’apat una prassi giurìdica in favore de sas limbas minorizadas. Custu cheret nàrrere chi, sena una protetzione legale paritària, su multilinguismu europeu abarrat unu cuntzetu teòricu ebbia. Un’iscàtula bòida.
mauro piredda
Leave a comment