A pustis de sas ùrtimas temporadas arribadas in Sardigna, s’emergèntzia ìdrica paret torrada a sa normalidade. Segundu sos datos prus reghentes publicados dae s’Enas e agiornados a su 30 de ghennàrgiu 2026, su sistema de sas digas de s’ìsula tenet una bundàntzia chi non si bidiat dae tempus.
Sos nùmeros sunt de ispera manna pro su benidore: sos batzinos sunt arribados a su sessantasete pro chentu de su lìmite màssimu autorizadu, cun una riserva de agiumai unu milliardu de metros cubos de abba (998 milliones), cunsiderende chi su potentziale diat èssere de unu milliardu e mesu.
Custu cuadru nos dat a pensare chi si potzat assegurare s’irrigatzione de sos sartos e de sas campuras, sena timere istrinturas a sa cuntzessione de s’abba. Si ponimus sa situatzione de oe a cara a sas matessi dies de ocannu passadu, bidimus chi, in su 2025, sa Sardigna fiat firma a unu barantachimbe pro chentu chi faghiat timòria, mentres duos annos a oe sa cuota non brincaiat su chimbantachimbe pro chentu.
Sa relata est istada presentada dae s’Enas, chi at mustradu comente sa bundàntzia de abba non tèngiat paragones cun sos annos colados.
Ma b’at logos de s’ìsula chi tenent galu sidis. Si sa lente de iscumprou abarrat a su Nord-Ovest e mescamente a sa Nurra, bidimus chi sa diga de su Cuga tenet su barantaduos pro chentu e Monteleone su baranta sese, suta de sa metade de su volùmene ùtile. Mancat galu carchi millione de metros cubos pro arribare a su chimbanta pro chentu, ma s’andanta est positiva: sos livellos àrtziant de carchi puntu pertzentuale onni die.
Noas bonas arribant dae su Bidighinzu chi, cun su chimbantaduos pro chentu, at in finitia coladu su lìmite mìnimu, mancari tochet de àere prudèntzia in sa gestione, si si cheret garantire s’irrigatzione pro totu s’annada.
S’atentzione est arta fintzas in àteros batzinos isparghinados in s’ìsula, comente su Mularza (trintanoe pro chentu) o su Iscasume (bintoto pro chentu). Ma sas dies chi benint lassant isperas bonas: s’obietivu de s’Enas est de pònnere in seguresa sas cussòrgias chi sunt galu in suferèntzia, pro assegurare un’annada agrìcula bona pro totus.
Salvatore Taras
Leave a comment