Foto de Luca Foddai
Domìniga 14 de nadale, a sas 19,00, in su Teatru Tzìvicu de Tàtari est andadu in iscena su primu de sos tres apuntamentos de sa rassegna Voci di Natale, organizadu dae s’assòtziu Ars Aurelia, cun sa diretzione artìstica de Irene Dore, chi at saludadu su pùblicu in sa pàusa de s’ispetàculu.
Sos ispetadores ant assìstidu a su Galà lìricu Rossini Party. Su mezosopranu Marta Pluda, italiana de Lonato, in provìntzia de Brescia, e su barìtonu William Hernández, costaricanu cun istùdios in su cunservatòriu fiorentinu Luigi Cherubini, acumpangiados a su pianoforte dae Daniela González, argentina ma tataresa de adotzione, ant propostu motivos leados dae tres de sas òperas de su cumposidore marchigianu: Il barbiere di Siviglia, L’italiana in Algeri e La Cenerentola.
Hernàndez at abertu s’ispetàculu cun Largo al factotum della città, dae Il barbiere di Siviglia. De Marta Pluda su pùblicu at apretziadu in modu particulare Non più mesta accanto al fuoco, dae La Cenerentola.
Sos duos artistas si sunt dispididos a sa fine de su recital cun unu bis, torrende a propònnere su duetu de Rosina e Figaro, dae Il Barbiere di Siviglia.
At presentadu Serenella Medici.
(gianni muroni)
Leave a comment