Cun sa tzerimònia de sàbadu su 22 de santandria, su Prèmiu Otieri de literadura sarda nche ponet in archìviu sa de 66 editziones. Sa serada, conduida dae Piersandro Pillonca e trasmìtida in direta dae su canale Youtube de su Prèmiu, at dadu ondras a sa poesia e a sa prosa in sardu – e in sas àteras limbas de Sardigna – premiende 9 autores de sos 85 chi b’ant pigadu parte.
Su presidente de sa Giuria Dino Manca e sos àteros cumponentes (Anna Cristina Serra, Cristiano Becciu, Duilio Caocci, Clara Farina, Attilio Mastino, Riccardo Mura, Giambernardo Piroddi, Simone Pisano, Gabriele Tanda, Salvatore Tola e su tesimòngiu istòricu Antonio Canalis) ant evidentziadu sa partetzipatzione de medas giòvanos in totu sas tres setziones de su cuncursu. Sinnu chi «su Prèmiu – comente at naradu Manca sàbadu – s’est aberende semper de prus a sa sotziedade, a su mundu de sa comunicatzione, a sas artes noas» e chi «s’est sintonizende cun còdighes, canales e cuntestos comunicativos de sas generatziones noas».
Colende·nche a sos premiados, est unu nùmene nou de su cuncursu su chi at bìnchidu in sa setzione de sos contos dedicada a Toninu Ledda: s’orunesu Luciano Goddi cun “Su catechìsimu de Madre Tilde”. Fatu-fatu ant premiadu a Manuel Cherchi de Santu Giuanni Suèrgiu cun “De campu e de tzilleri” e a su gavoesu Luca Sedda cun “Ballos”. In sa setzione “Tra poesia e càntigu – Antoni Cubeddu” s’oro si nche l’at leadu Antoni Nàtziu Garau de Biddobrana cun “Sa boxi muda de s’arrennegu” (serente a su dramma de sos palestinesos). Prata e brunzu a Gianfranco Garrucciu de Tèmpiu (“Tu se’ màggjina d’amori”) e a Sandro Biccai de Sindia (“Ite coro?”). In sa setzione “Poesia – Antoni Sanna” at bìnchidu imbetzes Teresa Piredda de Iscroca cun “Ingurtosus”, versos dedicados a sas fèminas. In segunda positzione Antoni Brundu de Orane cun “A ube sun fughidos sos brinchittos e sos disizos?” (custa puru in contu de Palestina). Su de tres est Domenico Battaglia, madaleninu, cun “Quiddu chi resta d’un fiori”. Ma sàbadu no ant premiadu petzi a sos autores de sos cumponimentos. Su prèmiu pro sa cultura l’ant dadu a s’illustradore nugoresu Manuelle Mureddu; su pro s’arte a sa cantante ulianesa Maria Luisa Congiu, su trofeu “Premio Ozieri” a su linguista Michele Loporcaro de s’Universidade de Zurigu (chi at faeddadu pro intreu in sardu), su trofeu “Città di Ozieri” a s’ex amministradore pùblicu e iscritore de Itireddu Diego Satta. Como su Prèmiu intrat in su de 70 anniversàrios: intro de nadale at a èssere publicadu su bandu nou. Sa novidade est chi dae annoas sa premiatzione l’ant a fàghere torra in cabudanni, su sàbadu a pustis de sa festa de su Rimèdiu comente fiat antigamente.
Gianfranca Orunesu
Leave a comment