Foto leada dae su situ de su Patriarcadu Latinu de Gerusalemme
In ocasione de sa solennidade de Corpus Domini su Patriarca Latinu de Gerusalemme Mussegnor Pizzaballa at ammentadu in sa prèiga su fàmene reale e ispirituale de sa gentòria chi fiat ascurtende a Deus e chi a sa fine Deus at satzadu cun su miràculu de sos chimbe panes e duos pisches.
Su cardinale no at pòdidu fàghere a mancu de ammentare sa situatzione chi est bivende s’Oriente Mèdiu in custu tempus. Su note intre su 12 e su 13 de làmpadas Israele at atacadu s’Iran, chi at rispostu a sos bombardamentos, iscadenende una gherra, finas si non decrarada.
In prus sighint sas operatziones militares israelianas contra a sos palestinesos, massimamente in Gaza.
Pizzaballa at naradu: «Bivimus unu tempus de fàmene reale duncas. E paris cun issu ddo’est su fàmene de giustìtzia, de beridade, de dignidade». E at agiuntu: «E in dae in antis a sa situatzione tràgica chi semus bivende, forsis nois puru tenimus sa matessi tentatzione de sos discìpulos. A nos dispidire. A rinuntziare. A bogare de càbudu. Sessare de isperare e de crèere chi siat possìbile a nos nche catzare su fàmene, chi calicunu potzat consolare su coro nostru sididu de giustìtzia e de dignidade. Chi custu cunflitu no at a pòdere mai cambiare sa vida nostra.
Sa risposta de sos discìpulos però est crara… e est duncas sa risposta pro nois puru oe, finas pro nois in Terrasanta: dage bois etotu a mandigare».
E at concruidu cun unu messàgiu de isperàntzia pro sas comunidades cristianas: «Chi siat fatu galu una borta su miràculu. Chi su Segnore multìplichet sos pagu panes e pisches nostros».
(gm)