Foto leada dae partidulaur.ro
A pustis de sas eletziones aiat reconnotu sa vitòria de Dan, ma duas dies a pustis George Simion, su candidadu a sas presidentziales de sa destra, at annuntziadu ca at a «pedire in bia ufitziale a sa Corte Costitutzionale de annullare sas eletziones presidentziales rumenas. Pro su pròpiu motivu chi sas eletziones de nadale sunt istadas annulladas: inteferèntzias esternas de istados e agentes no istatales. Custa borta est provadu! Nen sa Frantza nen sa Moldàvia, ne àtere tenent su deretu de interfèrrere in sas eletziones de aterunu istadu».
Su riferimentu a sa Moldàvia no est casuale, bidu ca unu de sos obietivos de sa destra rumena est pròpiu s’unificatzione de sos duos istados.
Simion at tentu sa solidariedade de unu de sos duos fundadores de Telegram, su servìtziu de messagìstica russu. Pavel Durov, chi sas dies coladas aiat denuntziadu de àere tentu pressiones de su guvernu frantzesu pro tzensurare sos cunservadores, at decraradu: «So prontu a bènnere e a testimoniare si custu at a agiuare sa democratzia rumena».
Dae sos Istados Unidos puru est bènnidu un’agiudu a Simion. Difatis finas David Sacks, s’impresàriu chi Donald Trump at numenadu cussigeri de sa Domo Bianca pro s’inteligèntzia artifitziale e sas criptovalutas, s’est espressadu in favore de su candidadu derrotadu, narende ca su resurtadu eletorale, dae unu puntu de bista istatìsticu, fiat agiumai impossìbile de capitare.
In s’ìnteri Dan s’est atopadu giai, in manera informale, cun sa presidente de su Parlamentu Europeu Roberta Metsola.
(gianni muroni)
Leave a comment