In Biddacidru sa de 40 editziones de su Prèmiu Dessì

E cun ocannu sunt 40 sas editziones de su Prèmiu literàriu Giuseppe Dessì. Nàschidu su 1986 in Biddacidru, su logu nadiu de s’autore de Paese d’ombre, su prèmiu s’est afirmadu in su tempus comente unu de sos apuntamentos culturales prus de importu in Sardigna e no in custa terra ebbia. Gente comente Alda Merini e Maurizio Cucchi (pro sa poesia) e comente Michela Murgia e Niccolò Ammaniti (pro sa narrativa) b’est colada cun sas òperas suas, ma finamentas persones de sa cultura comente Piero Angela, Piera Degli Esposti, Nicola Piovani, Dori Ghezzi e àteros b’ant lassadu trata. S’editzione de ocannu comintzat su 30 de maju cun sa criminòloga Roberta Bruzzone intervistada dae su giornalista Vito Biolchini. Sas initziativas de su prèmiu sighint finas a atòngiu atraessende totu s’istiu cun ispetàculos, addòbios cun sos autores e cuntzertos. Sa premiatzione est pro su 4 de santugaine cun òspites comente su geopolìticu Lucio Caracciolo, su fìsicu Guido Tonelli, s’autora Teresa Porcella, sos atores Andrea Bosca e Simone Faraon. Peristantu is organizadores ant serradu sa fase de imbiu de sas òperas dae parte de autores e domos editoras. Sos traballos lòmpidos los est abbaidende una giuria ghiada dae Anna Dolfi, esperta màssima de s’òpera de Dessì. Cun issa sos dotzentes universitàrios Duilio Caocci, Gino Ruozzi e Nicola Turi, su poeta e crìticu literàriu Giuseppe Langella, su giornalista Luigi Mascheroni, sa linguista e iscritora Francesca Serafini, su romanzeri e bibliotecàriu Fabio Stassi e unu rapresentante de sa Fondazione Dessì. A sa giuria su còmpitu de seletzionare in antis de totu is ses finalistas (tres pro sa narrativa e àteros tres pro sa poesia) e a pustis is duos binchidores assolutos (semper unu pro setzione) chi los ant a proclamare su die de sa tzerimònia de premiatzione.