Foto leada dae thefa.com
Su fùbalu ogna tantu nos torrat a propònnere s’istòria de Davide contra a Golia. Su sero de su 17 de maju, in s’istàdiu de Wembley, Davide fiat su Crystal Palace e Golia su Manchester City.
A unu ddoe fiat chirru un’iscuadra de Londra, pro èssere pretzisos de sa parte meridionale de sa metròpoli britànnica, chi no aiat mai bintu unu trofeu, a s’àtera s’iscuadra chi tenet a segus su dinari de sos Emirados Àrabos Unidos e chi in sos ùrtimos annos at bintu campionados, copas natzionales e sa prus importante de sas copas europeas.
Pro totu sa partida sos giogadores de su Manchester ant atacadu, custringhende in difesa sos aversàrios. Su possessu de sa botza est istadu superiore a su 78%, sena de contare su nùmeru prus artu de tiros e de corner.
S’ùnica istatìstica chi contat, però, su gol, est in favore de su Palace. A su de 16 minutos cun unu passàgiu longu dae sa lìnia de fundu a su chircu de tzentrocampu sos giogadore londinesos ant innescadu unu contratacu chi in 4 passàgios, s’ùrtimu de su colombianu Muñoz dae s’ala destra, at mandadu in rete a Eze.
Sa resistèntzia de sa formatzione in màllia ruja e biaita est istada eròica, cun unu rigore paradu dae su portieri Henderson a s’egitziano Marmoush a su 36’. Su nùmeru 1 est istadu detzisivu in nessi àteras duas ocasiones.
Mancu sos 10 minutos de recùperu cuntzèdidos dae s’àrbitru sunt bastados a su City pro lòmpere a su parègiu. Vitòria tàtica de su tècnicu austrìacu Glasner contra a su catalanu Guardiola. Comente mègius giogadore in campu est istadu premiadu Muñoz.
Su Crystal Palace, chi est in sa de dòighi positziones in campionadu, a prus de no àere mai bintu nudda in s’istòria sua no aiat mai partetzipadu a una copa europea.
Su triunfu in custa Copa de Inghilterra ddi dat su passaportu pro sa Europa League de s’annu chi benit, manifestatzione chi Glasner at giai bintu in su 2022 cun s’Eintracht de Francoforte.
(gianni muroni)
Leave a comment