«Mancu lòmpidos a Santa Luchia semus abarrados inghiriados dae una rete de sotzialidade chi at comintzadu a sestare a nou sa pretzetzione nostra de sos ispàtzios e de sas relatziones». Faeddos de sos produtores musicales Ale Bavo e Raffaele Rebaudengo, chi dae cussos ispàtzios e dae cussas relatziones nd’ant bogadu bator minutos de suite torrende a definire sa geografia sonora de su logu. Custu branu est in lìnia dae oe in sas prataformas digitales Spotify, YouTube, Amazon Music, Apple Music e Deezer.
Su nùmene suo est pròpiu “Santa Lucia”. Unu paesàgiu sonoru chi comintzat cun sa boghe narradora de Valeria Muledda (pigada dae s’audiodoc “Cicàlia”), chi sighit cun unos cantos versos de su poeta Giuanne Fiore (leados dae “Camineras” e resados dae Mauro Piredda) e chi finit cun sas boghes de su coru polifònicu “Santa Luchia de Siniscola” dirìgidu dae sa Maistra Grazia Miscera. Sos due musitzista de su collettivu Stellare (chi bi nde faghet parte fintzas un’àteru cumponente, FiloQ), ant comintzadu a cumassare totu in sas tres dies de s’A-mare Festival, su 6, su 7 e s’8 de cabudanni de s’annu coladu in sa fratzione costerina de Thiniscole.
Issos fiant òspites de sa residèntzia artìstica de s’evento e, cun s’aprontu de un’istùdiu de registratzione abertu a totu cantos, ant ingendradu una cumpositzione chi moviat dae sos sonos e dae sos paesàgios de su burgu. «Amus intesu un’ispètzia de dilatatzione, una deformatzione in sa pertzetzione de su tempus chi at puntelladu, comente una rivelatzione repentina, totu su traballu musicale. Sos colores, sos nuscos, sos sonos, su briu e s’assussegu, s’intimidade e sa cumpartzimenta chi amus bìvidu nche sunt in sa cumpositzione». S’iscurtu suo, duncas, est belle una «abbaidada a s’ispigru», narant sos duos produtores, dae tempus a costàgiu de musitzistas de vàllia comente Francesco De Gregori, Mina, Subsonica, Vinicio Capossela, Ermal Meta, Negramaro, Adrian Sherwood, Bloody Beetroots, Afterhours, Gino Paoli. In sa foto de cobertina de su branu, chi movet dae sa gràfica de su festival cuidadu dae s’assòtziu Frammenti, s’abba de su mare est sa protagonista. S’immàgine l’at fata Alex Goddi (Intu Agency), curadora, in pare cun Mariagrazia Canu e Luca Mura, de su festival.
Gianfranca Orunesu
Leave a comment